Inhlanganiso ezilwela amalungelo oluntu ezigoqela eyeHarare Metropolitan Residents Forum zithi zizaqhubeka zitshengisela zivimbela ikhansili yeHarare ukuthi isungule uhlelo olokubhadalela amanzi engakasetshenziswa olwe pre-paid water meters kulelidolobho.
Isiphathamandla senhlanganiso yeHarare Metropolitan Residents Forum, uMnu. Marvellous Khumalo uthi kuyadanisa ukuthi lanxa ikhansili yeHarare ithethe isinqumo izolo emhlanganweni we full council meeting esokuthi izamisa loluhlelo ngoba isakhulumisana labantu, umabhalane omkhulu walelidolobho uMnu. Tendai Mahachi yena uthi uhlelo lolu luqhubekela phambili njalo luzasungulwa emalokitshini eMabvuku leTafara.
UMnu. Khumalo utshele uSithandekile Mhlanga weStudio 7 ukuthi inhlanganiso yakhe imanyene leye ZCTU, Zimbabwe Coalition on Debt and Development , Community Water, leyeNational Youth Organization, itshengisele ngoLwesine emhlanganweni wekhansili njalo ngoLwesihlanu ibisichasisela intathelizindaba okwenzakalayo.
