Saturday, October 25, 2014 Local time: 16:44

Indaba / Ezombusazwe

S.Africa: Asisoze Sithathele Abalimi Amapulazi

x
Ntungamili Nkomo
Uhulumende weleSouth Africa uthi emizameni yakhe yokulungisisa udaba lomhlabathi, kasoze ahluthunele abalimi abamhlophe amapulazi abo njengalokhu okwenziwa nguhulumende weZanu PF.

Lokhu kuvezwe ngumphathintambo obona ngezomhlabathi kulelolizwe uMnu Gugile Nkwiti lomsekeli wakhe uMnu Solomon Lechesa Tsenoli emhlanganweni abawenze lentathelizindaba ngoLwesibili.

Amapulazi amanengi eSouth Africa asezandleni zabalimi abamhlophe njalo uzulu ukhala ngokuthi uhulumende kumele athathe amanyathelo aqotho lulungisiswe loludaba.

Lanxa uhulumende ekhuthaza abalimi laba ukuthi bamthengisele amanye amapulazi ukuze ehlalise abantu abamnyama, akwenzakali kalula lokhu.

Inengi lithi ngaphandle kokuthi uhulumende weSouth Africa athathele abalimi laba amapulazi njengokwenziwa yiZanu PF, udaba lomhlabathi luzahlala luhlupha.

Ukuhlaziya loludaba uNtungamili Nkomo weStudio 7 uxhume ingcwethi kwezombusazwe uMnu Zenzo Nkomo yena othi uhulumende weANC kumele aphathe udaba lomhlabathi lolu ngobunono obukhulu.