Umgadli weqembu le Highlanders uKnox Mutizwa usemlonyeni wabalandeli baleliqembu kulezinsuku ngenxa yendlela adlala ngayo.
UMutizwa, oleminyaka engamatshumi amabili lanye eyokuzalwa, uthi uqale ukudlala kuhle ngesikhathi abaqeqetshi beqembu bemsusa emhlubulweni wenkundla bemgaxa ijogwe lokudlala engumgadli othenjiweyo.
Lumdlali osehlohle amagoli ayisithupha kumidlalo yeligi kusizini yalonyaka, uthi ukudlala lomdlali olesikhathi eside edlala kusigaba saphezulu uObidiah Tarumbwa, kuphathise kakhulu ukuba ajwayele ukudlala engumgadli njalo ayenelise ukulitshayela emambuleni.
UMutizwa uthi umdlali onguye odlala ebakhuthaza bengabadlali beqembu le Highlanders ngesikhathi besenkundleni ngu Erick Mudzingwa.
Lumdlali uqale ukudlala kuqembu labasakhulayo ele Highlanders ngesikhathi esasengumfanyana kodwa yena ukudlala umdlalo wenguqu uqale edlalela iqembu le Njube Sundowns elabafana abasakhulayo.
Ukudlala kuhle kuka Mutizwa kwenze ukuba abizwe ukuzodlalela iqembu lesizwe elamajaha aleminyaka engaphansi kwamatshumi amabili lantathu lona eliphakathi komkhankaso wokuyadlala kumidlalo ye African Championships njalo elizangqikilana lelabosowabo ele South Africa kulimpelaviki khonale kwele South Africa.
Lumdlalo uza lamathuba okuba uMutizwa labanye abadlali baleliqembu lama Young Warriors babonwe ngamaqembu eSouth Africa lapho abangaya hola khona imali ezingcono kulalezi abazithola kwele Zimbabwe.