Imidlalo ye African Union Sports Region V Under-20 Youth Games ezadlalelwa edolobheni lakoBulawayo kusukela mhlaka 4 kusiya ku 16 ngoMpalakazi ikhangelelwe ukuvulwa ngokusemthethweni kuyonale ngoMgqibelo koBulawayo, lapho umsekeli kamongameli uNkosikazi Joyce Mujuru ozabe enguye umhlonitshwa.
Amazwe akhangelelwe ukuphatheka kulumkhosi agoqelae eleSouth Africa, Zambia, Namibia, Malawi, Lesotho, Botswana, Mozambique, Angola, Swaziland, the Seychelles, Mauritius, Tanzania, Democratic Republic of Congo, and Madagascar.
Imidlalo okuzancintiswana kuyo ngeyenguqu, eyokubhukutsha eyokugijima, lminye eminengi-nengi.
Imidlalo le izadlalelwa endaweni ezigoqela iBulawayo City Pool, inkundla yeWhite City, Barborboufields, leLuveve Stadium.
Kodwa inengi edolobheni lakoBulawayo likhonona ngokuthi amankampani anikwa imvumo yokulungisa inkundla zemidlalo awaqhatshi abantu bakulelidolobho.
Okunengi ngaloludaba asikuzweni kungxoxo esiyiqhube lo Mnu. Alex Siziba, isiphathamandla senhlanganiso elwela amalungelo ezakhamizi ze Iminyela, egoqela iWhite City Stadium, yena ochasisela uSithandekile Mhlanga weStudio 7 ukuthi kusobala abasebenza kulinkundla bavela kwamanye amadolobho ngoba abenelisi ukukhuluma ulimi lweSindebele njalo balala khona e stadium.