Umkhokheli weMDC-T uMnu Morgan Tsvangirai sekhuthaze amalunga ebandla leli edale lephalamende ukuthi aye endaweni azimelayo ayekhulumisana lozulu ngokwenzakalayo kubandla.
UTsvangirai wethule inkuthazo le emhlanganweni awenze lamalunga la emahofisini ebandla lakhe ngoLwesithathu eHarare.
UTsvangirai uthe amalunga ephalamende la kumele ayetshela abasekeli bebandla ngokwenzakalayo, ngesikhathi lelibandla lilungiselela umhlangano walo omkhulu oweCongress ekupheleni kwenyanga ezayo.
Kodwa amalunga eMDC la atshele uTsvangirai ukuthi ukuya ezigabeni azimelayo ephalamende kuyahlupha ngoba kalamali yokuthenga amafutha ezimota.
Isiphathamandla saleli bandla uMnu Abednico Bhebhe utshele iStudio 7 ukuthi kuqakathekile ukuthi ibandla lakhe likhulumisane labalandeli balo.
Kunjalo nje, uTsvangirai uthi ibandla lakhe lithwele nzima ngokuqhuba inhlelo zalo ngoba libhekane lobunzima bemali.
Uthi ngokwehluleka ukupha ibandla lakhe imali emele liyithole phansi komthetho wePolitical Finances Act, uhulumende weZanu PF wenza lokhu ngabomo ejonge ukudiliza iMDC-T.
Uhulumende ukweleda ibandla leZanu PF leleMDC-T imali eyizigidi ezinhlanu.