WASHINGTON DC — Lanxa ikomishini yezokhetho iZimbabwe Electoral Commission isole uhulumende ngokwehluleka ukuyipha imali yokuqala uhlelo lokubhalisa abalelungelo lokuvota, sokuvele ukuthi iZEC yiyo eyaphambanisayo ngoba iphe uhulumende uluhlu lwendleko zayo sokusele ilanga elilodwa kuphela ukuthi iqalise umsebenzi.
Iwofisi yenhloko kahulumende uMnu Morgan Tsvangirai yiyo ephiwe umlandu wokulungiselela ukhetho lonyaka isebenzelana leZEC.
Ikomishini le ibimele iqale ukubhalisa abantu mhlaka 3 kulinyanga, kodwa iwofisi kaTsvangirai ithi yamukele indleko yeZEC mhlaka 2.
Ngalokho, bekungeneliseki ukuthi iwofisi le ikhulumisane lohulumende ikhitshwe imali sokusele ilanga elilodwa kuphela.
Umphathintambo wezemithetho uMnu Patrick Chinamasa ekhuluma ngeviki edluleyo, usole uTsvangirai ngokwehluleka ukutholisa iZEC imali.
Umsekeli kamgcinisihlalo walikomishini uNkosikazi Joyce Kazembe laye utshele iStudio 7 ngeviki edluleyo ukuthi behluleke ukuqala umsebenzi ngoba uhulumende engabaphanga mali.
Kodwa isikhulumeli sikaTsvangirai uMnu William Bango uthi iZEC yiyo eyaphambanisayo ngoba ingaphumanga loluhlu lwendleko zayo kusalesikhathi.
IZEC ithi idinga izigidi ezingamatshumi amabili lanye $21 million ukubhalisa abalelungelo lokuvota kanye lokuqhuba ukhetho.