amalinks wokungena

Breaking News

Biti: Umumo eZimbabwe Uqhubeka Usiba Mubi


Umnumzana Tendai Biti umkhokheli webandla lePDP
Umnumzana Tendai Biti umkhokheli webandla lePDP

Owayengumphathintambo wezemali, uMnu. Tendai Biti osengumkhokheli webandla le People’s Democratic Party uthi umumo wezombusazwe usufike kusimo esibi okokuthi kungaqhamuka udlakela lasiphi isikhathi.

Esethula imbono yakhe ngoLwesine emhlanganweni oqoqwe ngabenhlanganiso yeSouthern African Political Economy Series wokuhlaziya isimo sokungenzakala nxa umongameli Robert Mugabe engasuka esihlalweni, uBiti uthe sekulezibonelo ezinengi ezibalisa ukungabi khona komhlahlandlela wokumelama, umumo wezomnotho, ukungabi khona komkhokheli azamdedela embusweni laloba engehlelwa yingozi yokuphelelwa ngumpefumulo phakathi kombuso wakhe.

Wengeze esithi umumo ungahle uye nganxele izinto ziwonakale okwesabekayo zicine zimi manzonzo elizweni nxa labo abalezikhundla ezimqoka abangafuni ukuthi asuke esikhundleni bengathatha amanyathelo.

UBiti wengeze esithi lanxa kungaba lokumanyana kwamabandla ezombusazwe aphikisayo lelibusayo eleZanu PF, kulakho ukuqhamuka udlakela nxa uMugabe engasuka esihlalweni kathesi.

Uthe ithemba elikhona elingahlenga ilizwe kuphela yikuthi kubunjwe umanyano wenkokheli zamabandla atshiyeneyo ozacanda umhlandlela wokhetho njalo uthathe intambo zombuso okwesikhatshana ukhetho olukhululekileyo luze lwenziwe.

Kodwake abezinye inhlanganiso ezizimeleyo abakade bekhona emhlanganweni munye abanjenge Crisis in Zimbabwe Coalition bathi lobanje bevumelana laye uBiti ukuthi umumo ngempela uqhubeka usiba mubi kwezombusazwe lakwezenotho elizweni ababoni ukuthi kungabunjwa umanyano ozaphatha intambo zombuso okwesikhatshana kuqhutshwa ukhetho olukhululekileyo kungaphathisa ukuguqula lumumo nxa kukhangelwa ukufuthelana lembono ehlukileyo yamabandla ezombusazwe kanye lokudonselana kweziphathamandla phakathi kwebandla linye.

Baqhubeke bethi kabavumelani njalo lombono othi ibutho leZimbabwe lingahluthuna intambo zombuso nxa kukhangelwa ubudlelwano obuqinileyo obabunjwa nguMugabe labebutho.

please wait

No media source currently available

0:00 0:02:40 0:00
Lapho esitholakala khona

XS
SM
MD
LG