amalinks wokungena

Breaking News

Bayamsola UChombo Ngokwethusela Induna zeZimbabwe


UMnu. Ignatius Chombo
UMnu. Ignatius Chombo

Abalwela ilungelo loluntu bathi imizamo kamphathintambo wokubuswa kwezabelo lamadolobho umnumzana Ignatious Chombo yokwethusela izinduna zeZimbabwe ayincedi ngoba isisekelo sombuso sikubeka mgceke indlela okumele zisebenze ngayo.

Umnumzana Ignatious Chombo utshele izinduna esabelweni se Mashonaland West ngaliviki ukuba kumele besekele ibandla le Zanu PF betshiyane lomnumzana Themba Mliswa oncintisa eHurungwe West ezimele ngemva kokuba exotshwe kulelobandla.

Umnumzana Masimba Kuchera ocubungula ezombusazwe uthi ukwenza kukaChombo sokuvele kuyinhlala yenza kubandla le Zanu PF ngoba sokuke kwakhulunywa langumongameli Robert Mugabe kunye lomsekeli wakhe uMnu. Emmerson Mnangagwa.

Igqwetha elilwela amalungelo oluntu umnumzana Alec Muchadehama lithi imizamo ka Chombo ayincedi ngalutho ngoba isephula isisekelo sombuso esimvimba ukubamba ngamandla izinduna ukusekela ibandla lakhe ngoba bemele besebenze bekhululekile belaya imithetho yezabelo bengasekeli hlangothi.

UKuchera uthi uhulumende esilaye ukhanya esenza ngabomo ekhetha ukulandela imithetho kwezinye indaba kodwa evala amehlo akhe nxa indaba ethile ingahambelani lebandla lakhe. Uqhubeka uKuchera ethi imizamo ka Chombo ikhanya ibangelwa yikungazwanani osokukhona kubandla lakhe.

U Chombo utshele lezizinduna ukuba zitshiyane lokwamukela izipho ezivela kuMliswa ethi zimele zisekele iZanu PF ngoba iyiyo ekuhulumende njalo izinduna ziyinxenye yakhe.

Isahluko 281 sesisekelo sombuso esitsha sikubeka sobala ukuba izinduna azivunyezwa ukuba ngamalunga amabandla ezombusazwe kumbe ukusebenza ngendlela ekhomba ukusekela ibandla elithile kumbe ukuthuthukisa imisebenzi yalelo bandla.

XS
SM
MD
LG