amalinks wokungena

Breaking News

IZINASU Kayikabophisi uGrace Mugabe Ngesicoso sePhD


UNkosikazi Grace Mugabe lomsekeli kaMongameli welizwe uNkosikazi Joice Mujuru basanda kuthola izicoco zePhDs ekolitshini le University of Zimbabwe on Friday. (Courtesy photo)
UNkosikazi Grace Mugabe lomsekeli kaMongameli welizwe uNkosikazi Joice Mujuru basanda kuthola izicoco zePhDs ekolitshini le University of Zimbabwe on Friday. (Courtesy photo)

Inhlanganiso yezifundi eyeZimbabwe National Students’ Union ekade kumele ikhweze emthethwandaba ikolitshi leUniversity of Zimbabwe, uVice Chancellor uLevy Nyagura loMongameli Robert Mugabe ngokuphiwa kwesicoco seDoctor of Philosophy kuka Nkosikazi Grace Mugabe, kayisenzanga lokhu lamuhla.

Igqwetha elimela iZINASU, uMnu. Jacob Mapfume owenkampani yeMupangapatasa Legal Practitioners, uthi ucine ephuma kudaba lolu ngoba esebandleni lezombusazwe eleMDC Renewal Team.

Uthi lokhu bekuzalulaza isisindo sodaba lolu emthetwandaba. Uthi usedinge amagqwetha awenhlanganiso yeZimbabwe Lawyers for Human Rights ukuthi asebenze udaba lolu.

UMapfume uthi kunengi akade sekwenzile kudaba lolu okunjengokudinga konke okufunakalayo ngumthethwandaba weConstitutional Court lapho akade efuna ukukhweza udaba lolu.

Ubefuna ukuthi umthethwandaba wethule isinqumo sokuthi ikolitshi leU-Z liveze ingwalo ezitshengisa ukuthi isicoco sikaNkosikazi Mugabe sanikezwa ngemfanelo na. UMapfume uthi udaba lolu solukhangelelwe ukukhwezwa emthethwandaba impelaviki ingakafiki.

Kusenjalo, umqondisi weZINASU, uMnu. Gilbert Mutubuki, utshele iStudio 7 ukuthi ikolitshi leli selifuna ukumxotsha ngenxa yokufuna ukuhambisa udaba lolu emthethwandaba.

Uthi okumethusayo njalo yikuthi kulabantu abamfonela okungapheliyo bemethusela. Okwamanje izifundi zeU-Z zisemhlanganweni lapho ezixoxa khona ngodaba lolu.

Osebenza loMutubuki enhlanganisweni yeZINASU, uMnu, Praise Moyo, utshele uGibbs Dube weStudio 7 ukuthi loludaba luzasiwa emthethwandaba lobanje bebambekile kancane lamuhla.

XS
SM
MD
LG