Intathelizindaba esilamaviki amabili itshengisela eHarare phezu kombuso kaMongameli Mugabe uMnu Itai Dzamara utshaywe ngamapholisa waqaleka kabili ngoLwesine kwathi igqwetha lakhe uKennedy Masiye wabhaxabulwe wephuga ingalo.
UDzamara utshaywe ephakathi etshengisela ngokuthula eAfrica Unity Square labanye bakhe abalitshumi besithi kumele uMugabe asuke esikhundleni ngoba seyehlulekile ukulungisa okuhluphayo elizweni.
UMasiye utshaywe ezama ukukhulumisana lamapholisa njengegqwetha ngokutshaywa lokubotshwa kukaDzamara labanye bakhe.
UDzamara loMasiye balaliswe eAvenues Clinic njalo sikhuluma loDzamara kusikhatshana esisanda kwedlula ubefakwa amanzi emnzimbeni ngomtshina.
Abangane bakaDzamara ababili labo abatshaywe kakubi belatshiwe bakhululwa. Kodwa uDzamara loMasiye bazalala esibhedlela ngoba bekusimo esibi.
Sixhume ingwethi kwezombusazwe uMnu Dumisani Nkomo osole kakhulu amapholisa.
