amalinks wokungena

Breaking News

Kusungulwa Ugwalo lweZimbabwe National Code of Corporate Governance


Umsekeli kamongameli welizwe umnumzana Emmerson Mnangagwa uthi ukungethembeki sokuyiyo imbangela enkulu emisebenzini yokuhuga abamabhizimusi bakwamanye amazwe ukuzosungula amanye eZimbabwe lona ilizwe libhekane lobunzima bokutshabalala kwamankampani amanye awo edilika ngoba eqondiswa ngendlela elokungethembeki phakathi.

Ekhuluma embuthanweni wokusungula ugwalo olukhomba indlela ezinhle zokukhokhela olwe Zimbabwe National Code of Corporate Governance eHarare ngoLwesine, uMnangagwa uthe ukungethembeki, ubuqondisi obungayisibo kanye lokufumbathisana sokubangele ukutshabalala kwamabhizimusi eZimbabwe kunye lokuvalwa kwamabanga.

Umfundisi Paul Damasane okhokhele umthandazo kulumbuthano uthe ugwalo olunje luyinto eqakathekileyo abalusekelayo njengabafundisi. Uthi ukuthembeka kuyinto eqakathekileyo empilweni yomuntu wonke hatshi abamabhizimusi kuphela ethi njengamaSonto bathatha umkhuba ofana lokufumbathisana njengesono esiphazamisa isizwe khona kungumlando womuntu wonke ukuba ethembeke ngendlela ethuthukisa ilizwe. Uqhubeke ethi kuba nzima ukuba ilizwe lithuthuke kulokungethembeki ethi amazwe akhanya ephumelela akhetha umkhuba oqondileyo olobuntu kundlela asebenza ngayo.

UMnangagwa wazise lumhlangano ukuba uhulumende usekela ngokugcweleyo ugwalo olunje ethi uhulumende sesebenzelana lebhanga lesizwe ele Reserve Bank of Zimbabwe, ukulungisisa inkinga ezibhekana labama bhanga ukuba engabhekani lenkinga ezifana lokuqilibezela abantu kunye lokuzalwa kubangelwa yikungethembeki.

Ugwalo lolu uthi alungeke lwenelisa ukuphathisa kangako nxa lungela sekelo lwemali ekhuthaza ukusebenzelana kwaba mabhizimusi ukubuthelela imali engalusekela ethi njalo kuzadingakala ukuba kuguqulwe umthetho we Companies Act ngoba usugugile njalo abanye sebewusebenzisa ukuquba imisebenzi elokungthembeki kumabhizimusi.

Lolugwalo olwalungiswa yikukhokhela kwegqwetha uMnumzana Cannan Dube luthole usekelo lwenhlanganiso ezinengi ezigoqela i Bankers Association of Zimbabwe, Confederation of Zimbabwe Industries, Institute of Chartered Accountants le Zimbabwe National Chamber of Commerce.

Lumhlangano ungenwe yiziphathamandla zikahulumende, abahluli bemithethwandaba, abammeli bamanye amazwe eZimbabwe, amalunga edale lephalamende lele Senate kunye labosomabhizimusi ngosekelo lwamabhizimusi ambalwa agoqela i-Zimplats, Dairibord Zimbabwe, BAT Zimbabwe le Barclays Bank.

XS
SM
MD
LG