Inhlanganiso eqondisa umsebenzi wokuvimba ukumemetheka kokuthelelanwa igcikwane lengculaza eZimbabwe, eye National AIDS Council, ithi isizabisela amantombazana asakhulayo esikolo ukuyathola indlela zokuziphilisa kusetshenziswa imali evela eMelika kanye lakwamanye amazwe, kuyingxenye yemizamo yokuqeda ukumemetheka kwalumkhuhlane kubanga leli.
I-NAC ithi ithole izigidi phose ezingamatshumi amabili zamadola - $19million, evela kusikhwama sohlelo lukamongameli weMelika i-President’s Emergency Plan for AIDS Relief kanye lezinye inhlanganiso.
I-NAC ithi ingxenye enkulu yalimali izakuya kuhlelo lokubisela amantombazana aleminyaka ephakathi kwelitshumi lambili lama
tshumi amabili lane, esikolo kanye lokuyafundela imisebenzi elakho ukuwaphathisa ukuziphilisa, angaphethi engena engozini yokuthelelwa igcikwane lengculaza edinga ukuziselela.
Osakhulayo, uNkosazana Divine Maphosa, uthi amanani okukhulunywa ngawo ngegcikwane kubatsha, ayethusa , ikakhulu ngoba kabazihluphi vele ngokuyahlolwa igazi.
Udubo olukhona, uthi yibudlelwano obubakhona phakathi kwabadala labatsha kuphinde kube labatsha asebekhulile abazalwa belegcikwane, konke lokhu okuyikho okwenza abatsha babesengozini enkulu.
Umqondisi we UNICEF eZansi le Mpumalanga yezwekazi le Africa, uNkosikazi Leila Pakkala, uthi inani labantwana labasakhulayo elibulawa yingculaza, selaqonga ngokuphindwe kathathu kusukela kumnyaka ka 2000.
Kulokhu kulokungalingani kwamathuba ekutholeni imithi yengculaza ebantwaneni abaphila lalumkhuhlane kuzwekazi lonke le africa. Akudingakali ukuthi abantwana bathole igcikwane le hiv, kodwa lalapho bethe bathelelwa igcikwane, akudingeki ukuthi bafe. e-Africa, umuntu oyedwa kwabane ngosakhulayo, njalo ingculaza ludubo ababhekane lalo. Njengabantu abenza imithetho lenhlelo zengculaza, kumele lokhu singakukhohlwa empilweni zethu kanye lemisebenzini yethu
Osakhulayo uMnumzana Moses Madzikanda, uthi loluhlelo lokuphathisa abasakhulayo luqakathekile ngoba ukuswelakala kwamathuba sokwatshiya intsha ingumhlambi kazalusile.
Ukuhamba kwabazali besiya eSouth Africa leBotswana, uthi sokutshiye abantwana esikhaleni bengela ongabaxwayisa, bethathwa ngabadala abagangileyo ababachaphisa imingcele yelizwe okungekho emthethweni besiyabenzisa imisebenzi engela holo ngenxa yokuthi bayaswela indlela zokuziphilisa kanye longabahlawulela ezikolo.
Osakhulayo, okuhlelo lwabatsha i Young People Care esebenza leNAC, uNkosazana Sibonginkosi Ncube, uthi minengi imizi ekhokhelwa ngabantwana osokwenza ukuthi lababantwana behluleke ukuzinanza kanye lokufunda.
Uqhubeke esithi abantwana abanengi yibo asebengamabele endlela bedinga imali, bekhuthazwa ngabadala abangazihloniphiyo ababangenisa endaweni ezingalungelanga abasakhulayo.
UNkosazana Anne Moyo, osebenza labatsha, uthi intsha ibhekane lenhlupho ezingapheliyo ezigoqela ukuswela abazali, ukungafundi, ukweqiswa imigcele yelizwe okungekho emithethweni kanye lokuthelelwa igcikwane le ngculaza. Uqhubeke esithi inhlelo ezinje yizo eziswelakalayo ukuze kuphephiswe abantwana emkhuhlaneni wengculaza.
I PEPFAR ngolunye lwenhlelo eziqhutshwa kabanzi eZimbab
we ekuqedeni ukumemetheka kwengculaza kunhlangothi ezitshiyeneyo zelizwe. Luza ngesikhathi uhlangothi lwenhlanganiso yomanyano wamazwe olukhangela abantwana, iUnited Nations Children’s Fund (UNICEF), lusithi ingculaza yiyo imbangela yokufa kwenani eliphezulu kwabantwana abaphakathi kweminyaka elitshumi kusiya kutshumi lasitshiya galolunye ku zwekazi le Africa, njalo lelinani liya liqonga.
Loluhlelo lwamantombazana, olubizwa ngokuthi Determined Resilient Empowered AIDS-free Mentored Safe (DREAMS), luzaphathisa amantombazana la ukufeza amaphupho awo kundawo lapho okumemetheka khona ingculaza ngamandla okugoqela kubo Chipinge, Mutare, Gweru, Makoni, Bulawayo, Plumtree leMazowe.