Omanisipala belizweni lonke bakhuthaza abasemsebenzini wokwakhela uzulu indawo zokuhlala ukuthi kumele balandele imithetho endaweni abasebenzela khona ukuze kwehliswe uhlupho lwezindlu ezakhelwa endaweni ezingekho emthethweni emadolobheni ikakhulu e Harare.
Lokhu kuphume emkhosini wokuphawula okusemthethweni uhlelo lokwakhiwa kwezindlu ezedlula inkulungwane ezintathu-3,102, ngendleko yezigidi ezedlula kancane amatshumi ayisithupha- $62million, emzini ohlala abanengi eBudiriro eHarare.
Lumkhosi umanyaniswe lowokunanza usuku lokuqakathekisa ukutholiswa kukazulu indawo zokuhlala, olwe World Habitat Day, olunanzwa ngoMvulo wakuqala kuyonale inyanga kaMfumfu umhlaba wonke
Izindlu zeBudiriro lezi zakhiwe ngaphansi kohlelo lokumanyana phakathi kukamanisipala we Harare labenkampani ye Old Mutual ngenhloso yokutholisa abathola imali enlutshwana, abazithengayo bezakuzihlawula okweminyaka engamatshumi lambili - 20 year mortgage, kuzivumelwano labe bhanga leCABS okuluhlangothi lwenkampani yeOld Mutual.
Obengumhlonitshwa kulomkhosi, umphathintambo wezokwakha u Dr Ignatious Chombo utshele lumbuthano, lamuhla ekuseni, ukuba kuqakathekile ukuthi omanisipala benze imisebenzi yabo ngendlela lapho behlela indawo zokwakha emadolobheni.
Umqondisi weOld Mutual, umnumzana Jonasi Mushosho uveze ukuba uhlelo lwemzini weBudiriro lolu ngolunye lwenhlelo abenkampani yakhe abazihlelele ukuluqhuba elizweni eminyakeni emihlanu elandelayo. Lolu luhlose ukuthi kusiyaphela iminyaka emihlanu le, abenkampani yakhe babe sebanelise ukwakhela uzulu izindlu ezizinkulungwane ezilitshumi lanhlanu – 15,000 units, ekusebenzeleni kwabo labomanisipala emadolobheni ilizwe lonke.
Bebekhona njalo asebezitholile lezi zindlu ezilentengo esukela kunkulungwane ezimbili lambili zamadollar- US$22,000 kusiya kwengamatshumi amabili lasikhombisa - US$27,000. Inhlawulo yazo isukela kumadola phose amakhulu amabili - US$189,00 kusiya kweyedlula kancinyane amakhulu amabili - US233-00 ngenyanga okweminyaka engamatshumi amabili izala umthelo wesilinganiso sokulitshumi lambili ekhulwini - 12%.
Omunye wabatholiswe lezizindlu ngumfundisi webandla lenkonzo ye United Methodist ekhokela ibandla le Harare Central otshele iStudio Seven ukuba okwamanje uhlala endlini yebandla emzini ohlala abanengi we Egypt, e Highfields, unkosikazi Jongimpi Nyakusendwa ubemanzi te ethi ubonga umdali ukuba uselendlu yakhe.
Wengeze wathi ujatshuliswa yikuba useyitholile indawo yokuhlalo laye ebiza yena njengomfundisi ethi ngoba isikhathi esinengi abafundisi njengaye kuyibona abavame ukudubeka lapho sebetshiyile umsebenzi ngezizatho ezehlukeneyo.
Lumkhosi ungenwe zinkokheli zenhlangothi zikahulumende, abamankampani ehlukeyo, ezikamanisipala weHarare, amakhansila alelidolobho kanye lozulu weBudiriro.
Ubumanyaniswe njalo lokunanzwa kosuku oluqakathekisa ukutholiswa kukazulu indawo zokuhlala olwe World Habitat Day, othakazalelwe lonyaka phansi kwesihloko esithi “ VOICES FROM THE SLUMS ”.