Ingcwethi ekuhanjisweni kwembiko lokwabiwa kwamagagasi zithi uhulumende weZimbabwe uluma ephozisa engaphumeli uzulu egcekeni ukuthi mizamo bani ekhona ukuguqula indlela yokuhambisa amagagasi kungakafiki ilanga elimiswe emhlabeni wonke jikelele ukufeza inguquko le.
Amazwe omhlaba akhangelelwe ukuguqula indlela yokuhanjiswa kwamagagasi ivela kweyakudala eye Analogue isiya ku Digital ngenyanga ezayo mhlaka 17.
Lanxa uhulumende ubelokhu ethembisa ukuthi lokhu uzakufeza, imbiko evela kugatsha lokuhanjiswa kwembiko lokusakaza luthi aluzukwanelisa ukuqhuba lumsebenzi ngesikhathi kungakho luzaguqula indawo ezintathu kuphela ezilakho ukuphazamisa amazwe aseduzane azabe eseguqule indlela yokusakaza.
Imbiko le ithi elakuleli lizaguqula indawo ehambisa amagagasi eseKamativi elakho ukuphazamisa iZambia, iMutare kanye leNyanga ezilakho ukuphazamisa iMozambique kuthi lezi indawo eziseleyo zizaguqulwa kuminyaka emibili ezayo.
Umqondisi wenhlanganiso ebona ngokuhamba kwembiko, iMisa-Zimbabwe, uMnumzana Nhlanhla Ngwenya, uthi ukuthola imbiko ngemfanelo lilungelo eliqukethwe yisisekelo sombuso kodwa uhulumende akasiqakathekisi nxa kukhangelwa imizamo ayenzayo yokugcwalisa amalungelo oluntu.
Inguquko le ngeyinye yezizatho ezisetshenziswa nguhulumende ukwala ukupha izizalwane amalayisensi okusakaza esithi akungeke kwalunga kungakalungiswa ukuhamba kwamagagasi.
Uthi uhulumende uthule nje kakhulumi ukuthi kuzakwenzakalani kunyanga ezayo njengoba nje yena engasayikulandela izimiso ezavunyelwana ngumhlaba wonke ukuguqula indlela yokusakaza.
UMnumzana Ngwenya uqhubeke esithi uhulumende kumele aphumele uzulu egcekeni ayekele ukutshaya inja efihla umphini ngokunika abasakazayo imvumo yokwenza lokhu ngezigaba.
Uthi kuyadingeka ukuthi uzulu aqhubeke ekhulumisana lenkokheli ukuthi imali edingakalayo itholwe ngoba uhulumende usecatsha ngomunwe nje khona kusobala ukuthi kathandi ukupha abantu ilungelo lokuhambisa imbiko bathole lolwazi olungaveli kuhulumende kuphela ngaso sonke isikhathi ngoba uzulu laye uyathanda ukuxoxisana yedwa nje.
Owake waba yintathelizindaba njalo elwela amalungelo oluntu, uMnumzana Useni Sibanda, uthi uhulumende kacaci ukuthi indlela yena aseyikhethile kudigitisation engahambelani lakwamanye amazwe izaphazamisa njani ukusebenza kwabonakude kanye lemisakazo.
Uthi kunengi okuzaguquka kodwa uzulu usemnyameni ngokwenzakalayo ngaloluhlelo okwenza bacabange ukuthi uhulumende wenza ngabomo ukuze uzulu ahlale esemnyameni engazi okwenzakalayo.
Uhulumende uthi usengene kusivumelwano lenkampani yeChina, iHuawei, ukuletha okungamabhokisi okuzenza omabonakude bakudala bemukele amagagasi ngendlela entsha ama set boxes angamakhulu amane enkulungwane – 400 000 azabiza amadola amatshumi ayisithupha lambili -$62 ngalinye.