Ingcwethi ekwethulweni kwembiko lokwabiwa kwamagagasi zithi uhulumende kavezi ukuzimisela kwakhe ukunika izizalwane zeZimbabwe imvumo yokusungula imisakazo ezimeleyo ngoba engatshengisi isifiso sokugcwalisa amalungelo kazulu okuthola imbiko ngokugcweleyo.
Ukukhathazeka lokhu kuza ngemva kokuba umphathintambo wezokwethulwa kwembiko uMnumzana Jonathan Moyo etshele ikhomithi yedale lephalamende ekhangela lumsebenzi ngoLwesine ukuthi ilizwe lidinga ukuthola izigidi phose ezingamakhulu amabili amadola -$173 million kunyanga ezintathu ezizayo ukuthi iqhube umsebenzi wokuguqula ukusakaza – iDigitalisation okumele amazwe wonke emhlabeni ebe esekwenzile ngoNhlangula womnyaka ozayo.
Inguquko le ngeyinye yezizatho ezisetshenziswa nguhulumende ukwala ukupha izizalwane amalayisensi okusakaza esithi akungeke kwalunga kungakalungiswa ukuhamba kwamagagasi.
Ingcwethi zithi akuthembisi ukuthi limali izatholakala yena uhulumende evele ekhala ngezikhwama ezingakhali yona indibilitshi
Umqondisi wenhlanganiso ebona ngokwethulwa kwembiko, iMisa-Zimbabwe, uMnumzana Nhlanhla Ngwenya, uthi ukuthola imbiko ngemfanelo lilungelo eliqukethwe yisisekelo sombuso esitsha kodwa uhulumende akasiqakathekisi nxa kukhangelwa imizamo ayenzayo yokugcwalisa amalungelo oluntu.
Uthi nxa amaphephandaba lemisakazo kungatholi imvumo yokusebenza ngendlela egcwalisa izifiso zikazulu, isisekelo sombuso esikhona siyaba lugwalo nje olungaguquli impilo zabantu.
Okhangela ukuhanjiswa kwenhlelo kunhlanganiso yemisakazo kazulu, iZimbabwe Association of Community Radio Stations, uMnumzana Kudzwai Kwangwari, uthi inguquko kazulu ibakhona lapho izizalwane zithola imbiko evela kuhulumende ngokugcweleyo kuthi njalo zithole ithuba lokuxoxisana ngendingeko zokuthuthukisa izigaba zazo.
Uthi kuyadingeka ukuthi uzulu aqhubeke ekhulumisana lenkokheli ukuthi imali edingakalayo itholwe ngoba uhulumende usecatsha ngomunwe nje khona kusobala ukuthi kathandi ukupha abantu ilungelo lokuhambisa imbiko bathole lolwazi olungaveli kuhulumende kuphela ngaso sonke isikhathi ngoba uzulu laye uyathanda ukuxoxisana yedwa nje.
Okwakhathesi uhulumende uthi useguqule indawo zokusakaza ezilitshumi – 10 phezu kwezingamatshumi amabili lane 24, akhangelele ukuziguqula ukuze kusakazwe ngalindlela entsha. Lanxa uhulumende ekhangelele lelinani, ingcwethi zithi ilizwe lidinga ukuguqula indawo phose ezingamatshumi amahlanu – 48 ukuthi kusakazwe ngalindlela entsha kungela hlupho.
EleZimbabwe ngelinye lamazwe amalutshwane emhlabeni wonke jikelele elilokhu lilemisakazo ephethwe nguhulumende kungela ekazulu.