Umphathintambo wezemfundo uMnu. David Coltart usole kakhulu iziphathamandla zikahulumende womanyano ngokuchitha imali zisethekelela amanye amazwe endaweni yokuthi zisebenzise limali ukuthuthukisa inhlelo zemfundo.
Ekhuluma kudili lokuvalelisa izifundi ezedlula amatshumi amabili ezithole uncedo lokufunda emakolitshini eMelika, uColtart ungezelele wathi amanye amazwe ancedisa eleZimbabwe ngemali yokuthuthukisa inhlelo ezomvikela endaweni yokuthuthukisa ezemfundo.
Ekhuluma emkhosini ofanayo, omela isigodlo seMelika elizweni uMnu. Charles Ray kanye lomhlabeleli uOliver Mtukudzi bakhuthaze izifundi ukuthi zibuyele ekhaya zingaqeda izifundo ukwenzela ukuthi zithuthukise ilizwe.
Kunjalo-nje, uMnu. Sindiso Nyathi omunye wezifundi, othole uncedo lwescholarship sokuyafunda ekolitshini le Princeton University eMelika utshele uSithandekile Mhlanga weStudio 7 ukuthi uzasebenzisa ulwazi azaluthola kuzifundo zeEcology ukuthuthukisa eleZimbabwe.