Abazali abalabantwana ezikolo abazabhala imihloliso lonyaka bayakhonona ngokukhwezwa kwenhlawulo yale imihloliso lonyaka ngamadola amabili lemizamo ekhona eyokufuna ukuqala ukubhadalisa ukubhala imihloliso yesigabeni sesikhombisa eyegrade seven.
Umphathintambo wezemfundo uDr Lazarus Dokora uthi inhlawulo yemihloliso iqansa nje ngenxa yokuthi uhulumende udinga imali yokuthi abaphatha umsebenzi wokuqondisa limihloliso bawenze ngendlela kungela ndaba zokuthi amaphepha ayantshontshwa acine ephiwe abafundi isikhathi singakafiki.
Leli linyathelo elithathwa ngesikhathi uhulumende esithi ukuze inotho yelizwe ivikeleke kumele kungakhwezwa imali yeholo njalo lentengo yempahla ihlale injalo kumbe yehle.
Uhulumende uthi ukhangelele ukuthi aqale ukubhadalisa inhlawulo yemihloliso yezifundo zesigaba sesikhombisa ebesivele singahlawulelwa.
Umzali, uNkosikazi Charity Moyo uthi ukukhwezwa kwemali le ngesikhathi lesi akulunganga ngoba abazali abalayo imali njalo inengi seliphelelwe yimisebenzi.
Uthi lelinyathelo litsho ukuthi abantwana ikakhulu emaphandleni bazahlala bangaqhubekeli phambili ngezifundo zabo.
UNkosazana Precious Mudenge, ungumzali njalo olabantwana ababili ababhalayo. Uthi lokhu kuza ngesikhathi uhulumende kunguye owathi kudingakala ukuthi intengo yempahla lenhlawulo yokutshiyeneyo ingakhweli ilizwe lisazama ukuvuselela inotho yelizwe.
UNkosikazi Rita Sibanda uthi kazi ukuthi lesisizatho sokuthi kuthiwe limali izaphathisa ukuthi amaphepha angalahleki liqiniso yini ngoba ukungathembeki kwabantu akulani lemali ebhadalwa kunhlawulo yemihloliso.
Uthi kudingeka kuphela ukuthi abantu bathembeke benze umsebenzi wabo ngendlela hatshi ukutshona bebhadalisa abazali imali ezingapheliyo.
Uthi lanxa kungabanjwa ngamandla ukuthi umtwana abhale izifundo ezinengi, kuqakathekile ukuthi imali ehlawuliswayo imanelise ukubhala lezo abona angathi angaphumelela kuzo zimsize kwelakusasa.
Imali yenhlawulo le ikhwela ivela kumadola alitshumi lantathu isiya kumadola alitshumi lanhlanu. Uhulumende akaze abhadalise imihloliso ka Grade Seven ngoba lezizifundo aziphathisi mntwana ukuthola umsebenzi njalo ulakho ukuqhubekela phambili ngezifundo zakhe engaphumelelanga kuhle ezifundweni lezi.