Umphathintambo wezemaphandleni lokulodolozwa kwezemvelo, uMnu. Abednico Ncube uthi uhulumende uzabumba ikhomidi ebona ngokukhethwa kwezinduna ngoba sekulendaba ezinengi ezisemthethwandaba kuthoniswa indaba zokubanga ubuduna.
UNcube utshele iphephandaba le The Herald namhlanje ukuthi ikhomidi le izagoqela izinduna ezingomakhelwane kwalapho okuyabe kudingwa induna, abehofisi kamsitheli, leziphathamandla zogatsha lwakhe.
Wengezelele esithi izimuli kaziseyikuvunyelwa ukukhetha izinduna njengalokho kade kusenziwa kusukela endulo. Ukuhlaziya loludaba sixoxe lengcwethi kwezombusazwe, uMnu. Nhlanhla Dube endawonye loMnu. Thandeko Zinti Mkandla ingcwethi kwezamasiko onguye osungula lingxoxo.
UMkandla uthi lokhu kuzenza kubenxele ngoba uhulumende uzakuba esengenela endabeni angamelanga angene.
"Ngoba lawo ngamasiko abantu, ngumkantshow wabantu nxa sekukhulunywa ngezinduna ngoba izinduna azilani ngokunengi ngokosapo ngokomndeni. Kulendlela ezisetshenziswayo ukukhetha lokubeka induna. Kulendlela zokuthi kuxazululwa njani," kutsho uMkandla.
UDube laye uvumelana loMkandla engezela esithi izinduna sezithenwa ngoba ubuduna buyabe sebususiwe njengenkabi ezitheniweyo sezizabizwa ngokunye.
"Ubuduna ungakhangela busebantwini njengemuli ngamasiko langezenzo lokuthi bebuthola kwakwenzeni. Ungakhangela ubuduna obuvela kuluhlu lwehlangothini lwe Matabaleland uzananzelela ukuthi ubuduna yibuduna ngesijola, zinduna ngomkhonto, zinduna ngobukhokheli buvela empini," kutsho uDube.
Uthi zinduna ngomkhonto lobukhokheli buvela empini. Ngabantu abelmbali bemuli yakwabo ukuthi balwela isizwe njani. Kutsheyelwana ngemuli, ngegazi.
UMkandla uthi sekungena ezombusazwe ngoba sekuyindlela yokugoqa izinduna ukubana zithobele lowo ozakuba ezifaka esikhundleni.
"Imvama yikuthi nxa kulesikhundla esikhona lowo ofakwayo lapho nxa kungathi kulombango othize kasoze alandela okufunwa ngumphakathi kangako uzalandela yenalo ozakuthi wena nguwe. Izinduna sezizasebenzela yena lowo ozifaka esikhundleni," kutsho uMkandla.
Wengeselele esithi uhulumende ungenela kakhulu endabeni ezamasiko aze angenele kumasiko angawaziyo.
UDube uthi ngabe uhulumende aqale angene ebantwini adinge imbo kazulu anduba athathe izinqumo ezifana lalesi.
"Kulalokhu okuthiwa yireferendum ngesilungu lapho uhulumende angabuza ukuthi lokhu kungayenzakala yini ngoba le yinto yesiko ayisiyonto yamandlwane into etshiywa idlule yinto etshiyelwanayo eyokwakhiwa uluntu lwabantu," kutsho uDube.
UMkaandla uvumelane lo Dube ngokungenziwa wengezelela esithi: "Nxa uhulumende efuna ukululaza abantu besintwini, ikakhulu abomhlubulo wesi Ndebeleni kakwenze khonalokho ngobana uyabe esezitshele ukuthi kayisuye hulumende wabantu nguhulumende olenjongo."
