amalinks wokungena

Breaking News

Uhulumende Uveza Insuku Zeholo Lezisebenzi


Izisebenzi zikahulumende zithi kazilaqiniso lokuthi insuku zokuthola iholo ezintsha zizalandelwa nguhulumende okhanya engelamali yokuzibhadala nyanga zonke.

Izisebenzi ezikhulume leStudio 7 zithi kulungile ukuthi uhulumende aveze amalanga wonke eholo kusukela kulinyanga kusiyafika uMpalakazi.

Kodwa-ke zithi akuchachi ukuthi uhulumende uzathola imali ngesikhathi esifaneleyo sokubaholisa. Ziphinde zathi akumangalisi ukuthi aabakubutho bazahola phakathi kwamaviki amabili akuqala nyangazonke kuthi-ke ababalisi bahole kunsukwana ezilandelayo.

Zithi lokhu kwenziwe yikuba abakubutho bayesatshwa ukuthi bangenza umvukela bahluthunele uhulumende intambo zombuso nxa bengaholiswa ngemfanelo.

Ugwalo olwethulwe luhlangothi lukahulumende olubona ngeholo lezisebenzi lutshengisa ukuthi ezinye izisebenzi zikahulumende kanye lasebekupension bazathola iholo ekupheleni kwenyanga.

Amalanga la afakwe ngesikhathi uhulumende kade esehluleka ukuholisa izisebenzi ngamalanga afaneleyo. UMnu. Sifiso Ndlovu umqondisi we Zimbabwe Teachers Association uthi babukele ukuthi kozalwa nkomoni.

UMnu. Roderick Fayayo umqondisi weBulawayo Progressive Residents Association uthi amalanga afakwe nguhulumende aveza sobala ukuthi ilizwe kalilamali yokuholisa izisebenzi.

Kasenelisanga ukuxoxa loMnu. Patrick Chinamasa umphathintambo wezemali okade engaphenduli umakhalekhukhwini wakhe.
XS
SM
MD
LG