WASHINGTON DC — UProfessor Gordon Chavunduka obengumkhokheli wenhlanganiso yabelaphi besintu eye Zimbabwe National Traditional Healers Association-ZINATHA, akasekho. UChavunduka ubhube ngolweSihlanu ngemva kokulwisana okwesikhathi eside lomkhuhlane wemvukuzane yompimbo.
Okhulume emele imhuli yakoChavunduka uMnumzana Chris Mbanga uthi umuyi ugijinyiselwe esibhedlela seAvenues Clinic eHarare ngolweSihlanu ekuseni lapho afike waphelela khona.
Abantu babuthene emzini wakhe eMt Pleasant eHarare. Umuyi ubengumqeqetshi ekholitshini laseUniversity of Zimbabwe okweminyaka ethile wacina esenguVice Chancellor wayo kusukela ngo1992 kusiya ku1996. Ube engumlobi njalo wamabhuku athile emithi yesintu.
Utshiye umkakhe labantwana abahlanu abagoqela umsakazi odumileyo emisakazweni kamabonakude uAlice Chavunduka owaqala esebenzela iZimbabwe Brodcasting Corporation wazocina esesebenzela emisakazweni yase Ssouth Africa lapho alokhe ekhona okwamanje. Ukhangelelwe ukubekwa ngeviki ezayo ekhaya lapho adabuka khona koRusape esigabeni seManicaland.