Abantu abafika ikhulu lamatshumi ayisikhombisa – 170 abakade bethunjwe ngamalwecatsha ehoteleni yakwele Mali acatshangelwa ukuthi alandela iqembu lalabo ababizwa ngokuthi ngabe Al-Qaeda, sebekhululwe livuyo lebutho lomanyano weMelika, Mali, France lenhlanganiso yeUnited Nations.
Amalwecatsha la angene ewoteleni yeRadisson Blu Hotel, ejabulelwa kakhulu yizethekeli zakwamanye amazwe, esebenzisa imota ebhalwe inombolo ezinjengezabammeli bezigodlo zamanye amazwe eMali. Badubule abantu abathathu abagoqela isizalwane sakwele France okulilizwe elisanda kuhlaselwa ngamalwecatsha aweqembu le Islamic State - ISIS.
Amalwecatsha amabili abikwa esebulewe ngamasotsha ewoteleni le. Intathelizindaba ye VOA eseMali ibika ukuthi akulabantu abathi basekela amalwecatsha la.
Ummeli weZimbabwe kwele Senegal njalo okhangelane lokwenzakala eMali, uNkosikazi Trudy Stevenson, uthi kuyethusa okwenziwe ngamalwecatsha la.
UMnu. Denzel Dube osebenzela iwotela le utshele uGibbs Dube weStudio 7 ukuthi zonke izisebenzi zenkampani yale ihotela zethikile njalo zithithibele ngokwenzakeleyo. Uqhubeke ethi kodwa uzulu engethuki njalo engesabi ukusebenzisa amahotela abo becabanga ukuthi akula ezomvikela.
“Abantu bengacabanga ukuthi bekungela security, kodwa ibi khona sibili, lesi yisehlakalo esiyingozi eyokuthi lanxa ungazama okunganani ukuthi uzivikela nxa kuvele kuzakwenzakala kuyenzakala kungasintando yomuntu ukuthi kwenzakale” kutsho uDube.
