BULAWAYO — UNothando Sibanda intathelizindaba yeStudio 7 ekoBulawayo ubika ukuba sokwedlule iminyaka eyisikhombisa amazwe angezansi kwezwekazi leAfrica avumelana ukulinganisa amathuba abesifazana edale lephalamende, ukuze inani labo lilingane lelabesilisa kube yi 50/50. Kodwa inhlanganiso yeGender Links ithi amazwe la, agoqela iZimbabwe, akasoze akwenelise lokhu kusiya fika umnyaka ka 2015.
Amazwe la avumelana ngomnyaka ka 2005 ukuthi lokhu kulinganiswa kwamathuba kunhlangothi zonke zempilo ezithatha izinqumo ezimqoka kube sokwenziwe lapho kusiya fika umnyaka ka2015. Inhlanganiso ye Gender Links ithi kuyadanisa ukubona ukuba isimo siqhubeka sisiba sibi ngamandla endaweni yokuthi kube lenguquko.
Inhlanganiso le ithi nxa icubungula izehlakalo emazweni la, kuvela ukuba amazwe amane asemuhlubulweni lo owezansi yezwekazi leAfrica, yiwo kuphela azenelisa ukufikisa inani lamatshumi amane ekhulwini-40% labesifazana kunkokheli kwezombusazwe. Okulinani eliphansi kwesilinganiso sokungamatshumi amahlanu ekhulwini-50% elidingekayo.