Izizalwane zeZimbabwe zimanyene lezakwele South Africa abezitshengisela endaweni ezitshiyeneyo zelizwe ngoLwesithathu, zisithi umongameli Jacob Zuma akehle esihlalweni.
Ukutshengisela lokhu okuqoqwe kusetshenziswa inhlelo zebulenjini phansi kwesihloko esithi ZumaMustfall, kulandela inyathelo likamongameli Zuma lokutshintsha ntshintsha abaphathintambo bogatsha lwezemali okubangele ukuthi iRand lilahlekelwe ngamandla kanti osomabhizimusi labo balahlekelwa ngamabhiliyoni amaRand.
Bezithukuthele ziganunwabu izizalwane zakweleSouth Africa abezitshengisela eJohannesburg, ePretoria, eCape Town lasePort Elizabeth. Abebetshengisela laba bakubeke kwacaca ukuthi bafuna uZuma ehle esihlalweni ngemva kwephutha alenzileyo ekuxotsheni umphathintambo wogatsha lwezemali.
Ngeviki ephelileyo umongameli Zuma uxotshe umsebenzi umphathintambo wogatsha lwezemali umnumnzana Nhlanhla Nene, esikhundleni sakhe wafaka umnumnzana David Van Rooyen. Lokhu kubangele ukuwa kweRandi kwathi osomabhizimusi eJohannesburg Stock Exchange balahlekelwa ngamabhiliyoni amaRandi aphose afike amakhulu amabili (R171 billion). Kuthe ngemva kwensuku ezine uZuma wamsusa umnumnzana Van Rooyen esikhundleni sakhe wafaka umnumnzana Pravin Gordhan.
Leyinto ethukuthelise kakhulu abanengi kuleli okuyikho okubangele ukutshengisela kwalamhlanje.
Esinye isizalwane seZimbabwe abesiyingxenye yalokhu kutshengisela ngumnumnzana Godfrey Phiri yena othi eleSouthbAfrica kukhanya selilandela iZimbabwe yikhonje bebe yingxenye yalokhu kutshengisela.
Owayengunobhalala jikelele wenhlanganiso yezisebenzi kweleSouth Africa umnumnzana Zwelinzima Vavi uthi ilizwe lisengozini nxa lingaqhubeka lisezandlni zikamongameli Zuma yikho befuna ehle esihlalweni.
Esinye isizalwane seZimbabwe umnumnzana Farai Goodmore Mudzembwe, uthi njengoba besebenza kweleSouth Africa bebhadala umthetheo kuhulumende wakuleli, zonke izinqumo ezenziwayo ezingalunganga labo ziyabalimaza yikho bengene kulokhu kutshengisela.
Isikhulumeli sabatsha ebandleni leMDC-T kweleSouth Africa umnumnzana Tapiwa Diamond Chadya, uthi kungumlandu wamaAfrica wonke ukuncedisana ekulawuleni inkokheli zezwekazi leAfrica.
Umculo wezinkulungwane zabebetshengisela laba uhuge ngitsho lengane ezincane ebezizidlalela amadlwane duze leNelson Mandela Bridge lapho obekubuthene khona abebetshengisela laba.
Empilweni yakhe kwezombusazwe, umongameli Zuma usephunyuke kokunengi. Watholakala emsulwa emthethwendaba ngemva kokwetheswa icala lokudlwengula, kwesulwa inqwaba yamacala enkohlakalo ayebhekane lawo, waphunyuka sekuthiwa kusetshenziswe imali zikahulumende mahlayana emzini wakhe, kwaphinda kwehlula imizamo eminengi yamabandla aphikisayo yokuzama ukuthi iphalamende imethule esikhundleni.
Abasiki bebundake bathi nxa engaphunyuka lakulesi nsindabaphenduli, sizaphelelwa ngumutsho isaga esithi akuqili lazikhotha emhlane.