Izizalwane zeZimbabwe ezihlala kwele South Africa zithi sezidlela evalweni kulandela ukugqhekezwa kwezitolo zabokuza lokuthathelwa impahla. Lokhu kulandela ukudutshulwa kwesizalwane sakwele South Africa ngomunye usomabhizimusi wakwele Somalia othi osakhulayo lo amdubuleyo ubefuna ukugqekeza ibhizimusi lakhe.
Kubikwa kube lobudlwangudlwangu obenzakeleyo abantu begqekeza izitolo amapholisa egoqe izandla.
Kulelinye ipholisa elibikwa libonakale lalo lingena kwelinye ibhizimusi laphuma ligagadlele impahla zesitolo. Izizalwane zeZimbabwe zithi zidlela evalweni ngoba zisesaba ukuthi ubudlwangudlwangu lobu bungaqhela buzifinyelele lazo.
Kodwa isikhulumeli senhlanganiso yezizalwane zeZimbabwe ezihlala kwele South Africa eye Zimbabwe Community in South Africa, uMnu. Nicholas Nqabutho Mabhena utshele iStudio Seven ukuthi izizalwane zeZimbabwe zisinda kubudlwangudlwangu lobu ngoba kunzima ukuzehlukanisa lezizalwane zakwele South Africa.
