amalinks wokungena

Breaking News

Kuqhamuke Ukuxokozela Esigodlweni Sikamanisipala weHarare eseTown House


Abaphila ngokuthengisa ezitaladini zeHarare
Abaphila ngokuthengisa ezitaladini zeHarare

Kuqhamuke udlakela umsindo lokuxokozela ngoLwesibili ekuseni esigodlweni samahofisi kamanisipala we Harare ese Town House lapho phose amakhulu amabili abaphila ngokuthengisa ezitaladeni beze egumeni lale ihofisi befuna ukubuyiselwe impahla abayithathelwe ngamapholisa kamanisipala, kwacina kubotshwe abantu abahlanu lenkokheli yenhlanganiso yeNational Vendors Union Zimbabwe eze ukuzahlenga abanye babo.

Intathelizindaba lazo zingeniswe enkingeni, zaqonqoselwa ukuthi zehlukane lokuthathana lemifanekiso yalokho obekusenzakala lapho abanye babaphila ngokuthengisa bethathwa ngamapholisa.

Bekuxokozela ngesikhathi intathelizindaba zifika kulindawo lapho abaphila ngokuthengisa laba bebeganu nwabu, behluphana lamapholisa kamanisipala befuna babuyiselwe impahla yabo ethethwe lamuhla ekuseni.

Abathathelwe impahla yabo laba bebethukuthele, befuna ukubuyiselwa impahla yabo. Bebethwele amabhakana inengi labo kungabesifazane, abemumethe imibiko etshiyeneyo.

Bekuyimibuzo kuphela ebilotshwe kulamabhakana, ibuza inkokheli ukuba ifuna baphile njani njengoba ingekho imisebenzi eyathenjiswa uzulu ngesikhathi sokhetho luka 2013.

Umqondisi weNAVUZ umnumzana Samuel Wadzai uveze ukuba kabajatshuliswa yindlela umanisipala athathele amalunga ayo impahla.

Wathi u Wadzai, obekulandwe ngabantu kuyikuba bayibuyiselwe hatshi udlakela njengalokho obekusenziwa ngamapholisa kamanisipala.

Ungomunye wabacine sebevalelwe uWadzai ndawonye lophethe uhlangothi olubona ngezokuqhutshwa komsebenzi, unkosazana Lucy Makunde, ngoba bezame ukuhlenga amalunga amahlanu alenhlanganiso, abotshwe kuthiwa azasiwa emapholiseni eHarare Central Police.

Kuthethwe njalo intathelizindaba esebenza izimele, uEdgar Gweshe, wakhululwa ngemva kwesikhatshana, ebekwa umlandu wokuthatha imifanekiso lapho amapholisa etshaya abekade betshengisela befuna impahla yabo, inengi kungabesifazana.

Unkosikazi Majory Gobvu ngomunye laye othathelwe impahla yakhe, obetshinga kabi ethi kumele ayibuyiselwe ngoba kulapho athembele khona, ukuziphilisa yena lemhuli yakhe.

Umnumzana Abius Banda ophila ngokuthengisa laye, ubethukuthele ngesikhathi elandisa udaba lokuthathwa kwempahla yakhe. Uthi uBanda ubuhlungu ngendlela umanisipala asephatha ngayo izakhamizi ziHarare, ikakhulu abaphila ngokuthengisa njengaye.

Umnumzana Justin Sibanda ngomunye wezakhamizi ezibone abathathelwe impahla yabo laba behlukuluzwa ngamapholisa kuthiwa kabaphume emagumeni kamanisipala. USibanda usola indlela umanisiphala aphatha ngayo loludaba ethi kasikho isidingo sokubathathela impahla yabo.Ukhuthaza inkokheli ukuba zilungisise okufuqa uzulu ukuba acine eziphilisa ngokuyathengisa ezitaladeni.

Lanxa bekhona abatshayiweyo ngamapholisa, amanye awo beqhoke amahoforosi, umanisipala uyakulandula lokho ethi akwenzileyo yikubasusa emagumeni akhe kodwa uzulu enguye obesesenza udlakela.

Isikhulumeli sikamanisipala umnumzana Michael Chideme ulandule izehlakalo zokuba akhona amanye amapholisa kamanisipala, akade ehlawulisa imali yesibambiso kulabo abathengisela ezitaladeni ukuze impahla yabo ingaze yathathwa, ngesikhathi kubhodwa kuxotshwa wonke ophila ngokuthengisa. Wakhuthaza uzulu uChideme, ukuba azimangale izehlakalo zaloluhlobo, ethi ngoba azikho emthethweni.

Bakhona ababotshiweyo ngeviki epheleliyo bebekwa umlandu wokwala ukusuka endaweni abakade bethengisela khona impahla etshiyeneyo lapho kuhlangana khona umgwaqo u Jason Moyo lo Julius Nyerere.

XS
SM
MD
LG