Uhulumende usekhuthazwe ukuqakathekisa ukwakha izikolo endaweni lapho okulabantwana abalokhu besahamba imimango emide ukuyafika ezikolo lendaweni ezahlaliswa kutsha abantu okulokhu kungela ndawo zokufundela.
Inkuthazo le iza ngemva kokuba umphathintambo wezemfundo uDr Lazarus Dokora ethule umbiko othi uhulumende uthole izigidi ezingamatshumi amabili zamadola - $20 million ukwakha izikolo ezilitshumi lasikhombisa elizweni lonke jikelele.
Lanxa nje isigaba seMatabeleland sibikwa kuyiso esisilela izikolo kulazo zonke elizweni, sizathola ezimbili kuphela ngemva kokwabiwa kwalimali.
UNkosikazi Abigail Malotane, ofundisa kwesinye sezikolo esakhiwa yizakhamizi eBubi ngotshani lomdaka ngemva kweminyaka abantwabazo bengela ndawo yokufundela. Ukufundisa kulumumo, uthi kulukhuni ngoba izifuyo ziyangena endaweni zokufundela, umoya uyaphephula amabhuku kuthi abantwana labo bathwale nzima ukubhalela phezu kwamathangazi. Ethi indawo ezinje yizo ezidinga ukuthi uhulumende aziqakathekise lapho kutholakale imali yokuletha intuthuko kugatsha lwezemfundo.
Indawo ezinengi ezahlaliswa kutsha abantu ngaphansi kohlelo lokwabiwa komhlabathi, zilokhu zingelandawo zokufundela ezilohlonzi.
Osakhulayo, uMnumzana Michael Moyo, watshiya isikolo ngemva kokuba abazali bakhe beyehlaliswa kutsha eUmguza lapho okungela zikolo khona. Uthi lanxa encedisa abazali emhlabathini abawutholayo, inhliziyo yakhe ayikho lapha, ngoba ufisa ukubuyela esikolo laye abe lamathuba okufunda njengabanye abantwana. Nxa uhulumende engakhanga izikolo kulindawo, uthi kungcono asuke kulelipulazi ayehlala lezihlobo lapho azabalakho ukwenelisa ukuya esikolo.
Umnawakhe ongumfana, uMuziwethu, useleminyaka elitshumi kodwa ulokhu engakaqali ukufunda. Yena ke kakakuboni ukuthi utshiywa yisikhathi esithi khona sizafika isikhathi sokuthi ahambe esikolo agcwalise isifiso sakhe sokuba ngumtshayeli athengele unina okufiswa ngumoya wakhe. Zisesezinengi indawo lapho lanxa kulezikolo, zihanjelwa imimango engaphezu kwetshumi lamakhilomitha.
Kulimali etholakeleyo, iMashonaland West izathola izikolo ezine, IiMashonaland Central ezintathu, iMasvingo leManicaland ngambili ngambili kuthi iMashonaland East leMatabeleland South zithole ngasinye.
Ngomnyaka ka2013, ilizwe lalisilela izikolo ezingaphezu kwenkulungwane ezimbili – 2 056, kodwa kubikwa lelinani selaqonga.