amalinks wokungena

Breaking News

Umongameli Edgar Lungu weZambia Uvula Okusemthethweni Umbukiso weZITF


Amazwe angezansi kwezwekazi leAfrica athi azimisele ukusebenzelana ndawonye ukuthuthukisa ukulolongwa kwempahla ingakathengiswa ukuze inotho esemazweni la incede uzulu olapha hatshi ukuphuma isiyakwamanye amazwe akhatshana lapho ephenduka khona isidula.

Evula ngokusemthemthweni umbukiso walonyaka wezokuthengiselana owe Zimbabwe International Trade Fair, umongameli Edgar Chagwa Lungu weZambia, uthe lumbukiso ugcwalisa injongo zabakhokheli bamazwe akulumhlubulo ezivumelane ukuthi inotho yamazwe la ingathathwa ingalolongwangwa kodwa kuncediswane ukuthi amazwe la avule amabhizimisi emazweni akhelane lawo kungakabizwa abantu abakhatshana.

Uthi ubudlelwano kwezebhizimisi phakathi kweZimbabwe leZambia buyakhula, lapho iZimbabwe ethengisele impahla yayo eZambia amadola angaphezu kwezigidi ezingamakhulu amane – US$406 million, yathenga impahla kulelolizwe engaphezu kwebillion lamadola – US$1.3 billion kusukela ku mnyaka ka2010 kusiya ku 2014.

Indikimba yalonyaka ethi ‘Stmulating Trade: Seizing opportunities to Accelerate Growth’, uthi ilungele isikhathi lesi ngoba amazwe ase zansi yezwekazi leli afanele ukusebenzisa wonke amathuba angawathola ukuvula amabhizimisi lokuvuna kumpahla yawo kungakhathalekile ukuthi amazwe akhatshana athini.

Uqhubeke esithi ilizwe leZimbabwe liyakhanya ukuthi lithatha amanyathelo amanengi ukuthuthuka lisuka kusimo ebeselikuso. Uthi ubungane phakathi kwelizwe lakhe lelakuleli butshengisa ukuthi amazwe la ayasebenzelana ndawonye ukuthi akhule ngoba imbali yawo ixubene ingeke yahlukaniswe. Uthi iZimbabwe yilizwe elisenhlizweni yakhe kakhulu yikho nje laba ngelakuqala ukulethekelela ngemva kokukhethwa ukuba ngumongameli.

Ekhuluma ngemva kokubhoda ebona imbukiso, ilunga lebandla elibusayo iZanu PF, uDr Sikhanyiso Ndlovu, uthi imbukiso yalonyaka ilonhlonzi kuyakhanya ukuthi osomabhizimisi bakuleli bayazama ngazo zonke indlela ukusebenza kumumo onzima.

Uthi kuyadingeka ukuthi osomabhizimisi bakhuthazwe ngezinqumo ezikhupha imigoqo ebavimbelayo njalo bancediswe ngezimali ezizakwenza benelise ukulolonga impahla yakuleli ingakathengiselwa kwamanye amazwe.

Ukuthengisela kubomakhelwane kuqakathekile kodwa uthi kuyadingeka osomabhizimisi bakhe ubuhlobo lamazwe asentshonalanga e Europe kanye leNgilandi.

UMnumzana Lungu wangena kubukhokheli beZambia lonyaka ngoZibandlela, engumongameli wesithupha ngemva kokhetho olwabakhona kulandela ukubhubha kowayengumongameli uMnumzana Michael Sata yena owavula lumbukiso ngomnyaka ka 2012. UMnumzana Lungu wanqoba uMnumzana Hakainde Hichilema. UMnumzana Lungu owazalwa ngo 1956 eNdola, uligqwetha ngokufunda. Umbukiso walonyaka uvulelwe uzulu lamhla kusiyafika uMgqibelo lapho ozagqitshwa khona.

XS
SM
MD
LG