amalinks wokungena

Breaking News

UTymon Mabaleka Ungcwatshwa koBulawayo


Tymon Mabaleka
Tymon Mabaleka

Umuyi owadlalela iqembu le Highlanders wasebenza njalo labaculi abanengi abalodumo elizweni uTymon Mabaleka ubekwe emangcwabeni eLady Stanley edolobheni lako Bulawayo namhla ekuseni.

UMabaleka ubhubhele edolobheni leHarare ekupheleni kwenyanga ka Nhlangula mhla zingamatshumi amabili lesikhombisa ngemva kokuthwalelwa esibhedlela engezwa kuhle ekhala ngesifuba.

Ubhubhe eseleminyaka engamatshumi ayisithupha lane njalo umgcwabo wakhe uhlanganise abomdlalo wenguqu kanye labezomculo njengoba waduma edlalela iqembu le Highlanders kanye leqembu elimela isizwe ikanti ubevele esebenza labaculi ekucindezeleni ingoma enguProducer.

Owadlala lo Mabaleka kuqembu le Highlanders uKainot Luphahla uthe umfoka Mabaleka umtshiye esikhaleni ngoba ubungane babo baqala kudala besadlala bonke.

UMabaleka udlalele iqembu le Highlanders kusukela ngomnyaka ka 1973 evela kuqembu le Eastlands kwaze kwaba ngu 1982 lapho ayasebenzela khona esigodlweni iHarare wafika khonale wadlalela iqembu le Black Aces.

Owaduma evimbela iqembu le Highlanders uDouglas “British” Mloyi uchaze uMabaleka njengomuntu owayelesipho sobukhokheli owamfundisa okunengi empilweni.

Kwezomculo uMabaleka usebenze labaculi abalodumo ababencindezela imisebenzi yabo kunkampani ye Gramma le Zimbabwe Music Corporation abagoqela uLeornard Zhakata yena ochaze umuyi njengomuntu obefana lomzali kuye ngoba emondle kwezomculo kusukela esacathula.

Omunye umculi osebenze loMabaleka uObedia Mathulana uthe kwakuyisifiso sikamuyi ukuba eqoqe umcimbi wabaculi bonke asebenza labo uqhutshelwe kweleMandeleni wakhuthaza ukuba leliphupho lifezwe loba nje umnikazi walo esedlule emhlabeni.

Abanye abakade bekhona emsebenzini wokubeka uMabaleka ngabagoqela iziphathamandla zenhlanganiso yeZifa, inkokheli zeqembu le Highlanders kanye labaculi abasebenze lomuyi.

Umsekeli kamgcinisihlalo wenhlanganiso yeZifa uOmega Sibanda ukhuthaze bonke abomdlalo wenguqu ukuba belandele enyaweni zikaMabaleka yena ochazwe ngabebandla lokholo ele Sabatha njengomuntu obemesaba uNkulunkulu.

please wait

No media source currently available

0:00 0:03:25 0:00
Lapho esitholakala khona

XS
SM
MD
LG