amalinks wokungena

Breaking News

UMantshi Unquma Ukukhululwa Kwenkokheli Zenhlanganiso Ezilwela Ilungelo Loluntu


Umthethwandaba kaMantshi unqume ukuba uhulumende akhulule inkokheli ezintathu, zenhlanganiso ezilwela ilungelo loluntu, ebalisa umnumzana Mfundo Mlilo, Nixon Nyikadzino kanye lomnumzana Dirk Frey ngoba esephula isisekelo sombuso ngokugcina ababekwa umlandu, besezandleni zamapholisa okwesikhathi esedlula insuku ezimbili bengamiswanga phambi komthethwandaba.

Umantshi umnumzana Tendai Mahwe uphe lesi sinqumo edale ngoMvulo kudaba lokubotshwa kwabathathu ababalisa obona ngezokuqhutshwa komsebenzi kuCrisis Coalition in Zimbabwe, umnumzana Nixon Nykadzino, umqondisi weCombined Harare Residents Association kanye lomgcinisihlalo weOccupy Africa Unity Square umnumzana Dirk Frey. Yena uthi uthethe lesisinqumo ngemva kokubona kungela sizatho sokuba bengaze bakhululwa njengoba isisekelo sombuso sikubeka sobala ukuba obotshiweyo kumele amiswe phambi komthethwandaba, amahola angamatshumi amane lasitshiyagalombili engakedluli.

Lesi sinqumo siza ngemva kokuba iqgwetha labathathu laba umnumzana Gift Mtisi likhalaze ukuba akula sizatho sokube lokhe begciniwe ezandleni zamapholisa njengoba isikhathi sokuthi bamiswe phambi komthethwandaba besedlule ngakho kumele bakhululwe.

Wathi njalo umtshutshisi unkosikazi Idah Matete Maromo, kumele aguqule obekusemaphepheni akuqala okungazange kwaphikiswa ligqwetha elize limele uhulumende.

Inkokheli zenhlanganiso ezilwela ilungelo likazulu bezikhona edale likaMantshi ukuzosekela abavalelweyo, ezibalisa eye Chitungwiza Residents Trust – Chitrest, umnumzana Mavelous Khumalo otshengise ukusijabulela lesi sinqumo esithethwe lidale likaMantshi.

Kodwa uKhumalo uthi udaniswa yikwenza kukahulumende lapho umtshutshisi etshengise ukuqholoza lanxa isisekelo sombuso sikubeka sobala ukuba umuntu kumele asiwe edale lawo mahola abethiweyo engakedluli.

Abathathu laba babotshwe ngomgqibelo ngesikhathi beye sekela abanye babo abavalelwe ngoLwesihlanu, besetheswa umlandu wokutholakala besendaweni engavunyelwayo ngesikhathi beyebona inkokheli yeNational Vendors of Zimbabwe.

Khona bezabizwa edale ngamasamanisi ababotshiweyo laba,besetheswa umlandu wokubuthana endaweni engavunyelwayo.

Inkokheli ye NAVUZ abakade beyeyibona ngoLweSihlanu ibalisa umgcinisihlalo we NAVUZ uStendrick Zvorwadza, umqondisi wayo umnumzana Samuel Wadzai kanye lobona ngezokuqhutshwa kwenhlelo unkosazana Lucy Makunde.

XS
SM
MD
LG