EleZimbabwe liqhuba umhlangano wamazwe awezwekazi leAfrica, owe All-Africa International Honey Exposition 2014, oqalise ngoMvulo uphela ngoMgqibelo mhlaka 11Mpandula 2014.
Lumhlangano ongenwa ngabalimi lengcitshi ezivela emazweni awezwekazi le Africa kunye laphetsheya kolwandle uhlose ukuzophana amacebo ekuthuthukiseni umsebenzi wokufuywa kwenyosi.
Lumhlangano we Api-Expo owenziwa kanye phakathi kweminyaka emibili usungule ngoMvulo eHarare ungenwa ngabafuya inyosi abavela ema zweni afana le Uganda, Mozambique, South Africa le China phakathi kwamanengi.
Okhokhela iqula labafuya Inyosi eZansi yeAfrica leWillowvale Honey Agricultural Co-operative Limited, umnumzana Mlungiseleli Langeni uthi ukufuya inyosi kuyinto engaphathisa uzulu ukuthuthuka empilweni zabo njengalokho abakwenzayo ku khopa yabo. Uthi abantu kumele benanzelele njalo befundele ukugcinwa kwenyosi kakuhle njalo beqakathekise ukusebenza njengebhizimusi bezilungisela ezinye izinto kulokuthengisa uluju kuphela:
Elinye ilunga lenhlanganiso yeUbisi esebenzela eEastern Cape umnumzana Simphiwe Ntshwai uthi bamanyana njengabensundu badinga usekelo baphinda basebenzelana kakuhle labalimi abamhlophe bethola ulwazi olujulileyo kudaba lokufuywa kwenyosi kwabanikeza intuthuko.
Uhulumende we Zimbabwe ukhuthaza ukulungisiswa kwezinye izinto phezu kwemisebenzi yokuthapha uluju okuthiwa yi Value Addition, kubalimi bakuleli njengendlela yokwenqabela ubuyanga.
Amazwe afana le Uganda kunye le Kenya akhanya ehiwona aphezulu ezwekazi le Africa kuloludaba.Umnumzana Mugisha Elly okhokhela i Bushenyi honey yele Uganda uthi uthengisa uluju kunye lomuthi we propolis owelapha izifo ezinengi nengi kugoqela lesifo sesibindi lezinso kanti abe Kenya bona belungisa lamafutha lotshwala be Honey -Banana Wine.
I kolitshi le Bindura University of Science and Technology lithi selisungula izifundo ze diploma kumsebenzi wokufuya inyosi.
Lumhlangano uphela ngomgqibelo wayonale iviki.