amalinks wokungena

Breaking News

Umhlangano Ophathelane leNgculaza oweICASA Uyaqala eZimbabwe


Inhlanganiso ebona ngezempilakahle emhlabeni jikelele eye World Health Organisation yethule iziqondiso ezintsha ezokunikezwa kwabantu umuthi wengculaza ebizwa ngokuthi yiART, okungeminye yemizamo yokuqeda ukumemetheka kokuthelelanwa komkhuhlane lapho kusiyafika umnyaka ka2020, emhlanganweni omkhulu we ICASA.

Inhlanganiso ye World Health Organisation-WHO, ithi ukucubungula osokwenziwe kuveza ukuthi labo abahle baqale ukwelatshwa, i-Anti Retroviral Therapy, lapho betholakala ukuthi balengculaza, baqhuba ngcono kulalabo okumelelwa ukuthi amasotsha abo omzimba ehle.

Amazwe amanengi awezwekazi leAfrica ebengenelisi ukuthi aqalise bonke abantu kuART ngenxa yendleko ezikhona ekutholeni imithi le, kodwa amazwe anjenge Melika, British Columbia le Brazil ahle aqale mhla umuntu etholakala ukuthi ulegcikwane.

Umqondisi weWHO ezansi yezwekazi leAfrica, uDr Matshidiso Moeti, uthi lokhu kukhangelelwe ukuqala ngoMabasa 2016 okutsho ukuthi inani labantu elidinga amaARVs eAfrica, lizaqonga ngokuphindwe kabili, okutsho ukuthi kuzadingakala imali enengi.

Ukumelela umuntu aze aqale ukugula kumbe amasotsha akhe womzimba ehle, uthi kwenza umzimba wehluleke ukulwisana legcikwane njalo amathuba akhe okuthelela abanye aqanse.

Umhlangano weICASA 2015, uvulwe ngokusemthethweni ngeSonto kusihlwa ngumsekeli kamongameli welizwe, uMnumzana Emmerson Mnangagwa. Uthi lumkhuhlane udinga ukuthi abantu bahlanganise amakhanda ukuze kugcwaliseke izinqumo ze 90 90 90.

EleZimbabwe lidinge amaqembu amathathu alibazisa uzulu ngesikhathi kusenziwa lumhlangano abalisa iTumbuka Dance Group, iMokoomba kanye lelabantwana iZvandiri asungule ingoma eyiyo esetshenziswa kulumbuthano – iTheme song.

Izimiso lezi ze 90-90-90 zithi kusiyafika umnyaka ka 2020 kumele abantu abangamatshumi ayisitshiyagalolunye ekhulwini abaphila legcikwane besebesazi isimo sabo, inani elifanayo libe lithola ukwelatshwa i-antiretroviral therapy kuthi inani elifanayo njalo elelatshwayo libe lingasakhanyi igcikwane leli emzimbeni lalapho lihlolwa – iviral suppression.

ICASA
ICASA

Ongene lumhlangano, uNkosikazi Emelda Ngwenya, uthi lokhu kutsho ukuthi kuzadingakala imali enengi ukwelapha ingculaza njalo kuzamele kunanzelelwe ukuthi ama ARVs angacini esesilela emazweni amanengi eAfrica.

Okwakhathesi uthi vele eleZimbabwe aliqhubi kuhle kwezinye indawo ekunikeni uzulu ama ARVS, kungakho ulokunqineka ukuthi abazukuswela imithi ezibhedlela na.

UNkosikazi Moreblessings Dube, ungumongikazi osebenza labantu abaphila legcikwane lengculaza. Uthi emsebenzini wakhe uhlangana labantu abanengi abanganathi ama – ARVs abo ngendlela. Esithi kuyadingeka ukuthi ingcitshi emhlanganweni lo, zibonisane ukuthi kungenziwani ukuthi abantu balandele indlela okumele banathe ngayo ukuze asebenze ekwehliseni igcikwane elisemzimbeni yabo – iviral suppression.

ICASA
ICASA

Umhlangano weICASA 2015, ulethe ndawonye ingcitshi ezivela kunhlangothi ezitshiyeneyo zenhlanganiso yamazwe omhlaba, iUnited Nations, abacubungula bedinga indlela zokwelapha, iziphathamandla zabohulumende abatshiyeneyo kanye labantu abaphila legcikwane leli.

I-ICASA 2015 ilendikimba ethi “AIDS in Post 2015 Era: Linking Leadership, Science and Human Rights.”

XS
SM
MD
LG