Abaphila legcikwane elibangela umkhuhlane wengculaza bakhala ngokuqonga kwenhlawulo okumele bayikhokhe ukuze benelise ukungena umhlangano omkhulu wamazwe womhlaba wokuhlaziya ngezomkhuhlane lo, owe International Conference on Aids and Sexually Transmitted Diseases-ICASA ozakwenziwa ngeviki ezayo eHarare.
Ingcitshi zalumkhuhlane, odokotela, inkokheli yamazwe kunye labalwela ilungelo labaphila legcikwane bakhangelelwe ukubakhona kulumhlangano.
Umuntu ngamunye ukhangelelwe ukukhokha amakhulu amathathu amadola akwele Melika-$300, inhlanganiso zona zimele zihlawule amakhulu amahlanu amadola-$500.
Olwela ilungelo labaphila legcikwane, uMnumzana Dumisani Nkomo utshele uChris Gande Studio Seven ukuthi abaphila legcikwane abanengi bayafisa sibili ukuya kulumhlangano kodwa udubo olukhona yikuthi inengi labo kalisoze lenelise imbadalo edingakalayo.
“Kuqakathekile ukuthi inengi labaphila legcikwane liye emihlanganweni enje, ngoba umuntu elakho ukuthola amacebo lolwazi lwendlela zangalezi nsuku, ezilokhe zilolongwa zingcitshi zezempilakahle zokuthi umuntu aphile impilo ende elegcikwane, esazi ukuzinakekela” kutsho uNkomo.
