amalinks wokungena

Breaking News

Abanye Behluleka Ukuhlaba Inkomo ngeKhisimusi Ngenxa yeAnthrax


Ezinye imuli eziqintini zeMatebeleland South zidlale iKhisimusi engela gazana ngenxa yomkhuhlane wenyamazana oweAnthrax osuqhamuke eMzingwane obavimbe ukuhlaba inkomo.

Bekuyi Khisimusi engela nyama kwezinye imuli ebezile mcimbicimbi ngaleli khefu njalo zilenhloso yokubulala inkomo.

Lokhu kulandela ukuqhamuka komkhuhlane weAnthrax emangweni weMzingwane osuhlasele inkomo ezedlula amatshumi amathathu kanye labantu abambalwa.

Ngokunjalo, abezempilakahle sebemise ukuhlaba kanye lokuhambisa inyama ezigabeni ezilomkhuhlane lo.

Lokhu kufake imigoqo kunjabulo yeKhisimusi ngoba kusitsho ukuba imuli azenelisi ukuhlaba kumbe ukuthenga inyama.

Unkosikazi Edith Hlabangana oweSigodini uthi ukuqhamuka komkhuhlane kubavimbele ukukholisa imicimbi yabo kulenyama.

Kukanti omunye osebenza phandle kwelizwe, umnumzana Nkazimulo Nkala uthi badanile ukuthi ngemva kokuqoqa idili lemuli okomnyaka njalo belenhloso yokuhlaba inkomo, imizamo yabo iphelele emoyeni.

Kusenjalo, umaHlabangana uthi bayajabula ngendlela okubanjwe ngayo ukuqhamuka komkhuhlane lo ethi abempilakahle abazange badonde, kodwa bahle babazisa ngengozi ye anthrax.

Ukuphuma kwenyama esiqintini seMzingwane akuvunyelwa ngesikhathi abezempilakahle besahlolisisa umumo. Kucatshangelwa ukuthi umkhuhlane lo, olakho ukuyelapheka, ungabe sewafika emabhutsha akoBulawayo ngoba inengi lithenga inkomo zokuhlaba emaphandleni.

Umkhuhlane we anthrax ulakho ukubulala abantu uma bethe badla inyama yenkomo ebilomkhuhlane.

XS
SM
MD
LG