amalinks wokungena

Breaking News

UMnangagwa Ulungele Na Isikhundla Somsekeli Kamongameli


Umnumzana Emmerson Mnangagwa
Umnumzana Emmerson Mnangagwa

Ingcwethi kwezokucubungula kanye labezombusazwe baveza ukuba kungaba liphutha elikhulu nxa umphathintambo wezemithetho, umnumzana Emmerson Mnangagwa, engakhethwa ukuba athathe indawo kankosikazi Joice Mujuru, sokuba ngumsekeli kamongameli ebandleni lakuhulumende ngoba engasilungelanga leso isikhundla nxa sekukhangangelwa imbali yemisebenzi yakhe yokwephula ilungelo loluntu kusukela ekusungulweni kwalelibandla le Zanu PF.

Ubikwa engathandwa nguzulu weZimbabwe lowebandleni lakhe uMnangagwa ngenxa yalembali lanxa izibonakaliso zikhomba ukuthi nguye okhangelelwe ngabanengi ukuba nguye ongakhethwa ngumongameli Robert Mugabe ekupheleni kwalomhlangano wesithupha weNational People’s Congress owenzelwa eHarare.

UMnangagwa wazalwa eZvishavane ngomnyaka ka 1949 waya esikolo edolobheni leli. Ngomnyaka ka 1960 wabotshelwa ezombangazwe elilunga le Zapu wavalelwa ejele leKhami lapho aqedisa khona izifundo zakhe ze A level esejele waqhubeka waze waqeda izifundo zokuba ligqwetha.

Kuthe ngomnyaka ka 1973 wakhululwa wahle wabaleka elizweni waya kwele Zambia lapho asebenza khona njengegqwetha okwesikhatshana wasesiya emazweni atshiyeneyo abalisa ele Tanzania, Egypt le China.

Emhlanganweni weCongress ka 1976 yebandla le Zanu elaxexebuka kwele Zapu, uMnangagwa wakhethwa ukuba ngumcebisi kamongameli Robert Mugabe.

Ekutholeni uzubuse ngo1980 uMnangagwa waba ngumphathintambo wakuqala wogatsha lwezomvikela kwaze kusiyafika umnyaka ka 1988. Lesi yiso isikhathi okwabakhona lombhuqazwe we Gukurahundi ezigabeni zeMandebeleni laseNkabazwe.

Umnuzana Blessing Vava ngomunye wengcwethi zombusazwe othi akukho okuhle okungakhulunywa phezu kukaMnangagwa, ngoba zingcolile izandla zakhe, zijuluka igazi lalabo ayebabulala kusukela ngesikhathi sempi, eseGukurahundi ngemva kwempi yenkululkeko kanye lalapho kulungiselelwa ukhetho lwesibili luka 2008.

Into engenza uMnangagwa asitholiswe lesi sikhundla, uVava uthi kuyimbali aziwa ngayo, yokuthembeka kumongameli Mugabe lebandla leZanu PF, wazimisela ukuphatha imisebenzi yokuhlukuluza uzulu ophikisana lemibono yalelibandla, esebenzisa uhlangothi lokulondoloza ukuthula elizweni kusukela esempini kwaze kathi ilizwe selithole uzibuse.

Lokhu kusekelwe ngumkhokheli webandla eliphikisayo le People’s Democratic Union – PDU, umnumzana Sambuylelwe Tshabangu othi akekho okuhle angakutsho phezu kwenkokheli yeZanu PF ngoba ifana kakhulukazi uMnangagwa olembali yokwenza imisebenzi yocuku kuzulu ongabe ephikisane lemibono yebandla lakhe kanye lohulumende.

Uthi akathandwa ngabantu uMunangagwa, okugoqela laye uMugabe kodwa into ekhona ngaye, uTshabangu uthi kuyingoba ebonakala ingani unganeno ngoba enguvuma zonke okuboniswa yizehlakalo zembalini lapho wayevuma ukusetshenziswa ukuchitha igazi noma kanjani.

Lokhu uTshabangu uthi yikho okwenza akhethe ukulahla uNkosikazi Mujuru athande uMnangagwa onguvuma zonke lanxa esazi mhlophe ukuba akathandwa muntu ngenxa yezenzo zakhe ezilocuku kuzulu nxa kukhangelwa imbali yakhe.

Umnumzana Tjenesani Ntungakwa ungomunye wabacubunguli kwezembali yempi yenkululeko egxile kakhulu kweziphathelene lebandla le Pf Zapu, enhlanganisweni ye Revolutional Institute of Zimbabwe. Uthi akalaso isisindo uMunangagwa sokuba asithwale isikhundla sokuba ngumsekeli kamongameli weZimbabwe lanxa engakhethwa,esazi mhlophe ukuba akathandwa ngabantu. Uthi uNtungakwa, ukubeka uMnangagwa kuleso sikhundla kuliphutha eliyabe lenziwe nguMugabe njengoba kuzakhumbuza uzulu phezu kwezehlakalo zokuhlukuluzwa lokubulawa kwabantu kusukela ngomnyaka ka 1983.

Lokhu kugcizelelwa ngumnumzana Jeffrey Moyo oyintathelizindaba ezimeleyo ethi lanxa ezelwe ngemva ilizwe selithole uzibuse,uzizwile izehlakalo zocuku zikaMunangagwa,zokubulala ngoba ezinikele kubandla le Zanu Pf lomongameli Mugabe.

Ukhangelelwe ukuphuma lezinqumo ezilandelwa ukuqhuba umsebenzi ebandleni kanye lokukhethwa kwenkokheli ezintsha ezizolikhokhela lelibandla.

Izibonelo zikhomba ukuba uMugabe ulakho ukususa uMujuru esikhundleni siphiwe uMnangagwa.

UMujuru ususwa esikhundleni esetheswa amacala ambalwa okubalisa ukungathembeki kanye lobusela lanxa uzulu ethi lokho kuyize ngoba engekho omsulwa kulokho okutshiwo nguMugabe.

XS
SM
MD
LG