Ucwaningo olwenziwe yinhlanganiso ye Mass Public Opion luveza ukuba uMongameli Robert Mugabe ulosekelo olunengi kakhulu elizweni.
Lolucwaningo olwasungulwa yinhlanganiso yakwele South Africa eye Afro Barometer luveze ukuba ebantwini ababuziweyo abayisilinganiso esingamatshumi ayisikhombiso abahlala emaphandleni basekela uMongameli Mugabe.
Inhlanganiso ye Afro Barometer ithi usekelo lukamongameli Mugabe luqonge ngesilinganiso esingamatshumi amane ekhulwini emadolobheni lapho kade engela sekelo khona.
Linhlanganiso ithi umongameli webandla le MDC-T, uMnu. Morgan Tsvangirai yena ulosekelo oluyisilinganiso esingamatshumi amathathu lasikhombisa ekhulwini.
Iphinde yacubungula linhlanganiso, usekelo lukazulu kunhlanganiso ezifana lebona ngezokhetho, eye Zimbabwe Electoral Commission, iZEC leyemithelo, iZimbabwe Revenue Authority yathola ukuthi lezi nhlangothi zilosekelo olukhulu nxa kuqathaniswa loluphiwa inkokheli yamabandla aphikisayo. Linhlanganiso ithi abesifazana yibo abathakazelela ibandla le Zanu PF kulabesilisa.
Ukuhlaziya loludaba uChris Gande weStudio Seven uxoxe lonobhala jikelele webandla leMDC ekhokhelwa nguMnu. Welshman Ncube, uMnu. Moses Mzila Ndlovu endawonye lelunga lebandla leZanu PF kugatsha lwabatsha, uMnu. Impehlabayo Malinga.