Ukwethulwa kwenhlamvu zomthetho wokhetho, owe Electoral Bill, ojonge ukuqondisa ukukhethwa kwamalunga edale le Senate le phalamende izolo kugwalondaba lukahulumende, iGovernment Gazette, sekudale inkulumo evela kungcwethi zomthetho labamabandla aphikisayo.
Umongameli Robert Mugabe wafaka isandla sakhe kulumthetho ngemva kokuba amadale womabili, isenate le phalamende ehliziye lumthetho awuvuma. Lumthetho uphathelane lamalunga akhethwe ngamabandla ezombusazwe kuphela hatshi amalunga avotelwe nguzulu.
Ukungethulwa masinyane kwalumthetho kubikwa bekuyikho okubangela ukuthi owayengusibalukhulu webhanga lesizwe, uMnu. Gideon Gono, abengu senator.
Umkhokheli webandla le National Constitutional Assembly, uMnu. Lovemore Madhuku, usole lumthetho esithi kawusoze uphathise uzulu ngoba uvumela ukuthi ugatsha lwezokhetho, olwe Zimbabwe Electoral Commission lube ngumlamlankunzi lapho kube lokungavumelani kwamabandla ngokukhetha amalunga.
Lokhu kugcizelelwe yisikhulumeli secele leMDC elikhokhelwa nguMnu. Welshman Ncube, uMnu. Nhlanhla Dube othi bazawuphikisa emthethwandaba lumthetho.