Umongameli Robert Mugabe ukhuthaze ukumanyana ebandleni lakhe leZanu PF esithi leli bandla liqhuba umhlangano walo omkhulu weCongress yesithupha lilokudonselana okungazake kubonakale embalini yaleli bandla ngemva kokuvinjwa kwemizamo ayithi ibisenziwa ngumsekeli wakhe uNkosikazi Joice Mujuru yokugenqula umbuso wakhe.
UMugabe ubeka uMujuru labanye bakhe abamsekelayo, umlandu wokusebenzelana lamazwe angentshonalanga kanye lebandla le MDC-T emizameni yokufuna ukumsusa esikhundleni ngodlame.
Lokhu kuphume ngesikhathi amalunga ebandla le Zanu Pf engena umhlangano we Central Committee owenzelwe emahosini esigodlo se Zanu Pf eHarare ngoLwesithathu.
Bathithibele abekade bekulomhlangano, ingekho injabulo evame ukuba khona lapho kungenwa imihlangano efana lowe Central Committe ngemva kwezehlakalo esezithe zaba khona, kubethwa abanye ngamagama, kuthiwa bebedinga indlela zokufuna ukuhluthuna intambo zombuso.
Bezikhona izikhexe okube yisibonelo sokuba inengi lalabo kungabacatshangelwa ukuba basekela uhlangothi olukhokhelwa ngunkosikazi Mujuru bengazanga ukuzangena lumhlangano ngemva kokuba uhlangothi lwabontanga lukubeke sobala ukuba kabayi kubavumela.
Uyakuvuma uMugabe ukuba kawukho umanyano ebandleni alikhokhelayo njengalokho obekucatshangelwa, kubangisanwa izikhundla, wakhuthaza inkokheli ukuba zisuthiseke ngalezo eziziphetheyo, zilindele amathuba azo okuba zikhethwe kweziphezulu nguzulu hatshi ukuhluthuna ngamandla.
Waveza ukuba kunje abanye babo bengawungenanga lumhlangano we Central Committe lanxa balwa impi yenkululeko, besaphila kodwa ngoba betshengise ukungathembeki ebandleni.
UMugabe utshele lumhlangano ukuba akekho ozakumhluthunela intambo zombuso njengoba yena wakhethwa ngumdali ukuba abuse ilizwe le Zimbabwe.
Wengeza ethi labo alokhe besalemicabango yokusebenzelana labelungu bengela ndawo ebandleni alikhokhelayo le Zanu Pf ngoba kungabathengisi abafuna ukubuyisela ilizwe emuva,libuswe njalo ngabokuza.
UMugabe utshele lumhlangano we Central Committee ukuba ukuba iCongress yalonyaka yesithupha ikhangelelwe ukuphuma lezinqumo ezizaphathisa ukuqhutshwa ngendlela komsebenzi ebandleni lakhe kanye lokulungisisa okuphosisiweyo kunhlelo zalo.
Kulabo abacatshangelwa ukuba bakuhlangothi olusekela unkosikazi Mujuru abangene lumhlangano walamuhla,wokwandulela umhlangano we Congress yesithupha,okhangelelwe ukuvulwa okusemthethweni kusasa,babalisa unkosikazi Olivia Muchena lomnumzana Simon Khaya Moyo.
Kuthi umnumzana Webster Shamu yena ongene ngesikhathi umongameli Mugabe eseqalile ukwethula umbiko wakhe,akahlalanga isikhathi eside,uphume ngemva kokunikeza iphepha ebelilamagama alabo abalahlekelwe yimiphefumulo kuwonalo umnyaka njalo kungabalwa impi yenkululeko.
Unkosikazi Joice Mujuru,umnumzana Dydimus Mutasa labanye abanengi bebengekho kulomhlangano okuyisibonelo sokuba sebelahlekelwe yizikhundla zabo osekusele kuphele yikuba kwaziswe uzulu okusemthethweni.
Lumhlangano we Central Committee uthethe lelithuba ukuhlonipha wonke amaqhawe alahlekelwe yimiphefumulo kuwonalo umnyaka ka 2014 kusukela kwabanikezwa inhlonipho yokuba ngamaqhawe elizwe kanye lawezigaba – National and Provincial Heroes.
UMugabe uthethe lelithuba ukwazisa lamalunga phezu kwemfa yomunye wabalwa inkululeko, umnumzana Khotsho Dube, wasesigabeni seMatebeleland South, obhubhe kuthange, watholiswa inhlonipho yeqhawe lelizwe njalo ezabekwa emathuneni aweNational Heroes Acre ngeNsonto ekuseni.