amalinks wokungena

Breaking News

Umongameli Robert Mugabe Uvula Okusemthethweni iCongress yeZanu PF


Umongameli Robert Mugabe uvule okusemthethweni umhlangano wesithupha weCongress yeZanu Pf etshela uzulu ukuba zonke inkokheli zebandla lakuhulumende ezizatholakala zilecala lokudinga amaqhinga wokufuna ukumbulala kanye lokungathembeki, zizabotshwa, zisiwe emthethwandaba ubufakazi obugcweleyo bungatholakala.

Uzulu obebuthene endaweni esisaziwa ngokuthi Robert Mugabe Square, ube ecula egiya ingoma zokutema umongameli Mugabe emhlanganweni wesithupha we National People’s Congress eka 2014.

UMugabe obekhanya engumuntu odiniweyo, uze kulomhlangano ekhatshwe ngumkakhe unkosikazi Grace Mugabe, wasungula inkulumo yakhe ngokuxolisa kuzulu phezu kokuba inkokheli yebandla yehlulekile ukuzigcwalisa izifiso zikazulu njengalokho obekukhangelelwe.

Waveza ukuba abanye bakhe besebenzise lezo zikhundla ukuqhuba imisebenzi yokudinga amaqhinga wokugenqula lokumbulala njengalokho okwetheswa icele elikhokhelwa ngumsekeli kamongameli unkosikazi Joice Mujuru. Uthi umangaliswa yikuba bekhethe ukungabuyi emhlanganweni labo ababekwa umlandu wokufuna ukumbulala uMugabe, bahluthune intambo zombuso, batsho ukuba kuyini ababekade bekuhlosile lanxa engekho obavimbileyo.

Ubeke umlandu uhlangothi lwabesifazane olwe Women’s League, wokusekela unkosikazi Joice Mujuru ukuba athathe isikhundla sesibili sikamsekeli webandla kanye lelizwe ngemva kokwethula isicelo sokuba kizo zonke izikhundla ezintathu, zobukhokheli ebandleni lakuhulumende, esisodwa sakhona sinikezwe owesifazane.

Wengeza ethi udaniswa yikuba lowo muntu abamsekelayo sekunguye osekhokhela iqula lalabo asebedinga amaqhinga wokufuna ukubulala umongameli kanye lokuhluthuna amandla ombuso.

Umnumzana Sikhosana nguye obeguqulela esiNdebeleni inkulumo kaMugabe le ngesikhathi ekhulumisana lozulu ovele ezigabeni zonke ezilitshumi elizweni ukuzangena lumhlangano we National People's Congress owenzelwa e Harare.

UMugabe uqhubeke ethi lanxa besebekade babuthola ubufakazi phezu kwemisebenzi yokufuna ukugenqula umbuso kaMugabe, bayekele ngabomo ukuthatha amanyathelo besenzela ukuthi inkokheli ezigabeni kube yizo ezilulungisisayo.

Wengeza ethi kuzamele bajeziswe bonke abatholakala belecala lokwenza lokho kanye lokungathembeki. USikhosana ukuguqulele esiNdebeleni lokhu obekutshiwo nguMugabe.

Unkosikazi Joice Mujuru, omnumzana Dydimus Mutasa, Rugare Gumbo kanye lo Nicholas Goche bebengekho emhlanganweni ovulwe lamuhla okusemthethweni.

Umlawuli wedale lephalamende ele National Assembly, umnumzana Jacob Mudenda, umkhokheli wedale le Senate unkosikazi Edna Madzongwe, bebehlezi duzane loMugabe ngesikhathi evula lumhlangano okusemthethweni.

Umongameli Mugabe kasanelisanga ukuya koBulawayo lapho bekhangelelwe ukuyavula okusemthethweni imidlalo yabontanga yamazwe awezwekazi le Africa.

Umbuthano walamhlanje ungenwe ngabammeli bamazwe atshiyeneyo eZimbabwe, inkokheli ye Zanu Pf ilizwe lonke, inkokheli kahulumende, amalunga amabandla aphatheka kuzimpi zenkululeko kumazwe ezwekazi le Africa kanye labaze ukuzalibazisa uzulu okubalisa uSulumani Chimbetu lo Chinx.

XS
SM
MD
LG