UMnu Didymus Mutasa uthi akakunanzi ukuxotshwa kwakhe kubandla leZanu, njalo uthi uzancintisa kukhetho lokudinga ummeli wesigaba ekade esimela edale lephalamende.
UMutasa loMnu Temba Mliswa baxotshwe kokuphela lidale leZanu PF Politburo ngoLwesithathu besetheswa icala lokweyisa inkokheli yebandla.
Kodwa ekhuluma leStudio 7, uMnu Mutasa uthe ulokhu elilunga leZanu F njalo uthi akulamuntu ongamxotsha kuleli bandla.
Uthi sokusobala ukuthi uMongameli Mugabe kaselamandla njalo umkakhe uNkosikazi Grace Mugabe nguye oselawula ebandlani.
UMutasa uthi lokhu kuvele mgceke emhlanganweni wePolitburo lapho uNkosikazi Mugabe eze ehlale etafuleni yamalunga ePresidium abalisa uMugabe labasekeli bakhe, uMnu Phelekezela Mphoko loMnu Emmerson Mnangagwa.
Ukuhlaziya loludaba sixhume ingcwethi kwezombusazwe uMnu Dumisani Nkomo.
