amalinks wokungena

Breaking News

UNkosikazi Joice Mujuru Uxotshwa Kuhulumende Labaphathintambo Abayisikhombisa


Umongameli Robert Mugabe usexotshe umsekeli wakhe unkosikazi Joice Mujuru umsebenzi, labaphathintambo abasekela icele lakhe, bebekwa umlandu wokufuna ukumthethela intambo zombuso ngendlela ezingayisizo.

Lokhu kuza ngemva kokuba umsekeli kamongameli Mugabe, unkosikazi Joice Mujuru, ethule umbiko wakhe ophume kumaphephandaba ambalwa aweZimbabwe ezigeza emacaleni awetheswayo.

Ubufakazi obukhona buveza ukuba abaxotshiweyo laba babalisa obengumsekeli kamongameli unkosikazi Joice Mujuru, umphathintambo wezokusetshenziswa kwemitshina yakulezi nsuku – ICT, umnumzana Webster Shamu, umsekeli kamphathintambo wezemihlobo yamandla kagetsi umnumzana Munacho Mutezo, umphathintambo wesigaba se Mashonaland East umnumzana Simbaneuta Mudarikwa, Mudarikwa, umphathintambo wohlangothi wabontanga, ukunikezwa kwamandla kwabensundu kanye lokuthuthiswa kwabo umnumzana Francis Nhema, umphathintambo wemfundo yaphezulu unkosikazi Olivia Muchena, umphathintambo wezokuthuthukiswa kwamandla kagetsi umnumzana Dzikamai Mavhaire, umphathintambo obona ngezendaba zezisebenzi kanye lenhlalakahle kazulu,umnumzana Nicholas Goche kanye lomphathintambo ebona ngezindaba zehofisini kamongameli umnumzana Didymus Mutasa.

Encwadini elotshwe ngumkhokheli wedale labampathintambo umnumzana Misheck Sibanda esezandleni zeStudio Seven uMugabe usebenzise isigaba sika Section 108 (1) (a) esesisekelo sombuso welizwe esitsha esithi abampathintambo laba behluleke ukuqhuba kuhle umsebenzi njengalokho obekukhangelelwe.

Omunye wabaxotshiweyo uMavhaire uvumile ukuba ngempela uyitholile incwadi yokumxotsha umsebenzi lanxa engasathandanga ukugcila ekuthini kuyini okunye okumunyethwe yincwadi ayilotshelwe nguMugabe.

Uzulu weHarare utshengise ukukhathazeka ngalesi senzo sikaMugabe bethi ukuxotshwa kwalaba bantu kungelani lamacala okungathembeki abawetheswayo ngoba kuvele kubhahile kulelibandla lakuhulumende kodwa kuyizibonakaliso zokuba usethatha lelithuba lokuvala indaba ekhona sibi sibili ukuxotsha laba bantu.

Umkhokheli wenhlanganiso ye Media Centre, uMnu. Ernest Mudzengi, uthi lokhu kwenza kukaMugabe kuzakulimaza ibandla le Zanu PF emaphethelweni.

Laba bantu abaxotshwayo, uMudzengi uthi baxotshwa nje bebanengi ngasikhathi sinye ngoba bengela ababalandelayo.

Wengeza ethi lokhu akulani lendaba zokungathembeki, ngoba engekho omsulwa kulelibandla njalo bekusenzakala kusukela ilizwe lithola uzibuse ngomnyaka ka 1980.

Uthi kodwa yindlela kaMugabe ukubajezisa bonke ababekwa umlandu wokusekela uMujuru emcabangweni wakhe wokufuna ukususa uMugabe, athathe yena intambo zombuso.

UMnu. Mfundo Mlilo uyisikhulumeli enhlanganisweni emela uzulu ye Crisis Coalition inZimbabwe. Yenake uthi uzulu kumele alungiselele ukubhekana lobunzima njengoba ababangele ukuxotshwa kwalaba baphathintambo, kulicele elikhokhelwa ungumnumzana Emmerson Munangagwa.

Uthi bona njengenhlanganiso benza imizamo yokuba bacebise ekuthini ilizwe lingaqhutshwa kanjani ekuthuthukiseni umnotho welizwe lalokuthi lungaqhutshwa kanjani uhlelo lwe ZIMASSET.

Uthi lalokho kuxotshwa kwasebexotshiwe kungasizi lutho kuzulu weZimbabwe ngoba kungasoze kuguqule isimo somnotho esesisibi kakhulu.

please wait

No media source currently available

0:00 0:05:35 0:00
Lapho esitholakala khona

Kunjalo nje, ukuxotshwa kukaNkosikazi Joice Mujuru sekutshiye uzulu ethandababuza ukuthi elakusasa lakhe lalabo abaxotshiweyo lizakuba njani. Ingcwethi ecubungula ezombusazwe, uMnu. Zenzele Ndebele utshele iStudio Seven ukuthi kaboni abantu laba besuka kubandla leli.

Ukuxotshwa kukankosikazi Mujuru labanye bakhe sokusitsho ukuba umongameli Mugabe usezakhetha abasekeli bakhe abatsha Kanye lokuguqula idale labampathintambo ele Cabinet.

Uzulu umelele ngamehlo abomvu ukuzwa ukuthi uMongameli Robert Mugabe uzakhetha bani kubandla lakhe abazangena kudale elikhulu lokubusa ilizwe ele Presidium.

Abantu abanengi bakhangelele ukuthi uMugabe kasoze acabange ngomsekeli wakhe uNkosikazi Joice Mujuru oselahliwa ecatshangelwa ukuthi wayefuna ukumugequla.

Abakhangelelwe ukuthi bazangena kudale lepresidium bagoqela abanjengoMnu. Emmerson Mnangagwa umphathintambo wezemithetho, uNkosikazi Eunice Sandi Moyo, uMnu Phelekezela Mphoko, uNkosikazi Oppah Muchinguri, uMnu. Simon Khaya Moyo loNkosikazi Ednah Madzongwe. Ibandla leli lamuhla belihlolisisa umomo womnotho welizwe, umumo webandla Kanye lohlelo lokuthuthukisa ilizwe olweZimbabwe Agenda for Social and Economic Transformation – iZIMASSET.

please wait

No media source currently available

0:00 0:02:20 0:00
Lapho esitholakala khona

XS
SM
MD
LG