Izizalwane zeZimbabwe eJohannesburg sezikhuthaze uhulumende wakweleSouth Africa ukuthi akhulule izihlobo zabo kumbe azithumele ekhaya njengoba seziqede iviki zisesitokisini ngemva kokubotshwa phansi kohlelo lweOperation Thanyela.
Amaqwetha ezamalungelo oluntu aye emthethwandaba kuviki eliphelileyo esiyavimba ukubuyiselwa ekhaya kwabakwamanye amazwe abedlula amakhulu amabli ababotshwe eJohannesburg phansi kohlelo lwe Operation Fiela.
Uhlelo lweOperation Thanyela olusungulwe nguhulumende wakweleSouth Africa ngenjongo yokuzingela abadala amacala elizweni, luqhubekela phambili ludlisa imbuya ngoluthi izizalwane zakwamanye amazwe kweleSouth Africa. Lobanje phansi kwaloluhlelo sekubotshwe abakwamanye amazwe abedlula inkulungwane, uhulumende wakweleSouth Africa uqhubekela phambili esithi loluhlelo alubhekiswanga kwabakwamanye amazwe kuphela kodwa lujonge ukuqeda ubugebengu elizweni.
Ngeviki ephelileyo iOperation Thanyela eqhutshwa ngamapholisa lamasotsha ingene edolobheni leJohannesburg kwabotshwa abakwamanye amazwe abedlula amakhulu amabili kugoqela lenengi lezizalwane zeZimbabwe ebezihlala eCentral Methodist Church eJohannesburg.
Ngemva kokubotshwa kwabantu laba amagqwetha ezamalungelo oluntu aye emthethwandaba esiyavimba ukubuyiselwa kwabo ekhaya kuze kubonakale ukuthi phakathi kwabo akukho yini abebelande ukuzophephela kweleSouth Africa.
Lokhu sekwenze ukuthi ababotshiweyo laba baqede iviki lonke bevalelwe ezinkambeni zamapholisa besamelele le inhlolisiso. Lokhuke yikho osekucunule inengi lezihlobo zababotshiweyo laba esezifuna ukuthi bakhululwe kumbe bahle baphindiselwe eZimbabwe hatshi ukugcinwa esitokisini njengezigebenga.
Umnumnzana Maxwell Ndlovu uthi umnewabo ubotshwe watshiya umkakhe lomntwana omncane, kanti lamanje kabakwazi ukuthi uzaphindiselwa yini ekhaya loba uzakhululwa.
Inhlanganiso zikazulu lazo sezethule ukhuthukuthela okukhulu ngohlelo lweOperation thanyela zisithi lohlelo luhlose ukuxotshwa abakwamanye amazwe kweleSouth Africa. Kodwake uhulumende kugoqela lomongameli Jacob Zuma sebekuphikisile lokhu njalo bathi loluhlelo luzaqhubeka kungenani lensolo ezikhona.
Isizalwane seZimbabwe uSiphamandla Mkheswa yena uthi kuvele kusegcekeni ukuthi uhulumende eqala loluhlelo wayehlose ukududula bonke abakwamanye amazwe abaseSouth Africa.
Kunani lasebebotshiwe phansi kwe Operation Thanyela izizalwane zeZimbabwe yizo ezinengi okwedlula abakwamanye amazwe. Loluhlelo luza ngemva kodlakela lwe xenophobia olutshiye abantu abayisikhombisa befile kugoqela loyedwa oweZimbabwe, kwathi izinkulungwane zabaleka emizini yazo.
Izizalwane zeZimbabwe eziyinkulungwane lamakhulu amane zacela ukuphindiselwa ekhaya ngemva kwaloludlakela ngoba zisesaba ukubuyela lapho abezihlala khona.