Uqhubekela phambili umhlangano omkhulu wenkokheli yezwekazi leAfrica loMongameli Barack Obama weMelika owethule umbiko wokuthi osomabhizimusi beMelika sebebeke amabillion adlula itshumi lane lamadollar – $14 billion yokwenza okutshiyeneyo eAfrica.
UMongameli Obama uthe imali le ngeyokwakha okutshiyeneyo okunjengemigwaqo, ukulungisa umlilo kagetsi, ukuvuselela imisebenzi yamabhanga lokuthuthukisa ezobulembu beInternet.
UObama uthe kukhangelelwe ukuthi eleMelika lidlelane ngamandla lamazwe wezwekazi leAfrica.
Uhlangane njalo lenkokheli yeAfrica emhlanganweni weUS-Africa Business Forum lapho okulabosomabhizimusi beMelika lamazwe atshiyeneyo.
Asebengene emhlanganweni lo bagoqela owayenguMongameli weMelika, uMnu. Bill Clinton, uNkosazana Dlamini Zuma wenhlanganiso yeAfrican Union Commission, osomabhizimusi abenengi abavela emazweni atshiyeneyo abagoqela uMnu. Strive Masiyiwa wenjampani ye Econet Wireless.
UMasiyiwa uthi sokwendlalwe intambo zobulembu beInternet obusuka eCape Town kwele South Africa kusiyafika eSomalia lapho asememiswe ngabalwisana lohulumende walelolizwe ababizwa yikuthi Al-Shabaab.
Uthi kumele kuthuthukiswe abasakhulayo emazweni wonke kuzwekazi leAfrica ukwenzela ukwenzela ukuthuthukisa umnotho wamazwe atshiyeneyo.
uMongameli Robert Mugabe kabizwanga emhlanganweni lo oqalise ngoMvulo. Kukhangelelwe ukuthi uhlangano lo ugqhitswa kusasa.
UMongameli Jacob Zuma weSouth Africa uthi uMongameli weMelika usebenza ngonanzelelo lenkokheli yezwekazi leAfrica esebenzisa ijwabu lakhe loba nje kukunengi akade kumele akwenzele abantu beAfrica engakatshiyi umsebenzi ngomyaka ka2016.
UZuma utshele osomabhizimusi, inkokheli yenhlanganiso ezizimele zodwa lentathelizindaba eU.S National Press Club ukuthi uObama wenza kahle kuzwekazi leAfrica njengoba engumuntu omnyama.
Amazwe kuzwekazi le Africa adlelana leMelika esebenzisa umthetho obizwa ngokuthi yiGrowth and Opportunity Act (AGOA), owenza ukuthi amazwe afika angamatshumi amabili athengise impahla eMelika leyo impahla ingabhadali umthelo wemigcele i-customs duty.
Lokhu kukhangelelwe uku phela ngomnyaka ozayo loba kusobala ukuthi amazwe ezwekazi leAfrica afuna kuqhubekele phambili. Ele Zimbabwe kalikho kulukho njengoba uMongameli Robert Mugabe, ongabizwanga emhlanganweni lo oweUS-Africa Leaders Summit oqalise izolo, njengoba wafakelwa izijeziso zenotho labanye bakhe kubandla le Zanu PF.
UZuma uphinde wathi impi yeIsrael lePalestine kumele imiswe ngenxa yokuthi sokufe abantu abanengi okwamagama abagoqela abantwana labomama.
Ingcwethi kwezombusazwe ezimele yodwa uMnu. Bekezela Maduma utshele iStudio 7 ukuthi uZuma ulubeke kahle udaba lobudlelwano bamazwe kuzwekazi leAfrica leMelika njalo wethule umgqondo okhaliphileyo ngempi yeIsrael lePalestine.
Izizalwane zeZimbabwe zikazatshengisele ezitaladeni zeHarare zikhonona ngokubulawa kwabantwana labantu bePalestine. Amazwe la alobudlelwano obaqalisa iZimbabwe ilwisana lohulumende kaIan Douglas Smith.