Amaqembu enguqu athi ele Dynamos, ele Chapungu, ele Harare City kanye lele ZPC Kariba yiwo asefinyelele ukuyadlala kusigaba sama semi - finals kumncintiswano wenkezo yeChibuku Super Cup ngemva kokuphumelela emidlalweni yama quarter - finals edlalwe ngempelaviki.
Iqembu le Chapungu lidlulele kusigaba esilandelayo esomncintiswano we Chibuku Super Cup ngemva kokutshaya ele Chicken Inn nge 5 ka 3 lokhu ngemva kokutshaywa kwembekwa emveni yokuba isikhathi siphele lawa maqembu engutshiki lobhanqa 1 ka 1 ngoMgqibelo.
Komunye umdlalo odlalwe ngoMgqibelo iqembu le Harare City libhaxabule ele Triangle nge 5 ka nya.
NgeSonto iqembu le ZPC Kariba litshaye ele How Mine nge 3 ka nya emdlalweni wakuqala kwathi umdlalo wesibili uphele iqembu le Dynamos linqobe ele FC Platinum nge 7 ka 6 ngemva kokutshaywa kwembekwa emveni yokuba isikhathi besiphele lawa maqembu etshayane aze abhekana kungela ebelitshayele ibhola emambuleni.
Esigabeni se semifinal iqembu le Dynamos lizatshayana lele Chapungu kuthi ele Harare City lizangqikilana lele ZPC Kariba.
Limpumela itsho ukuba iqembu le Dynamos yilo iqembu elingelinye lamaqembu alwisa ukuphakamisa isicoco se Castle Premier Soccer League elisele kumncintiswano wenkezo ye Chibuku ngemva kokuphuma kwe Chicken Inn le FC Platinum.
..............................................................
Sikhangele imidlalo yenguqu edlalwe kwamanye amazwe;
Kwele South Africa iqembu le Ajax Capetown yilo eliphakamise inkezo ye MTN8 ngemva kokunqoba ele Kaizer Chiefs nge 1 ka nya ngoMgqibelo.
NgaseNgilandi iqembu elihlezi phezu kwengalane ele Manchester City linqotshwe okwakuqala selokhu kuqale isizini entsha lapho litshaywa ngele West Ham nge 2 ka 1.
Leliqembu lilokhu kuyilo elihlezi kundawo yakuqala lilemiklomelo elitshumi lanhlanu kuthi ngemva kwalo kuleqembu le Manchester United lona elilemiklomelo elitshumi lantathu njalo elitshaye ele Southampton nge 3 ka 2 ngeSonto.
Elizweni le Spain iqembu le Barcelona linqobe ele Levante nge 4 ka 1 okuyimpumela etsho ukuba leliqembu selinqobe kuyo yonke imidlalo eseliyidlale kusigaba seligi.
Iqembu le Barcelona lihlezi phezu kwengalane lilemiklomelo elitshumi lambili ngemva kokudlala imidlalo emine kuthi ngemva kwalo kulamaqembu athi ele Real Madrid, ele Villareal kanye lele Celta Vigo alemiklomelo elitshumi iqembu ngalinye.
