Ugatsha lweBroadcasting Authority of Zimbabwe (BAZ) luthi uhlelo lokubuzisisa amankampani edinga amalayisensi okusakaza ethola inzuzo luzaqala mhlaka19 kulinyanga liyephela mhlaka29.
Uhlelo lolu luzaqhutshelwa emadolobheni amahlanu lapho okulamankampani adinga amaCommercial Radio licenses, agoqela iMasvingo, Zvishavane, Gweru, Mutare leKariba.
Amankampani adinga amalayisensi la agoqela amabili avele sesakaza, athi iAB Communications ekaMnu Super Mandiwanzira leZimpapers.
IBroadcasting Authority of Zimbabwe ayikatsho ukuthi uhlelo lolu luzaqhutshwa nini eHarare lakoBulawayo.
Isimemezelo seBAZ lesi siza ngesikhathi umsakazo weSW Radio Africa usithi uzavala ngeSonto ngesizatho sokuswela imali.
Umsakazo lo ubususakaza ebulenjini beInternet kuphela ngemva kokuvala inhlelo zawo kumagagasi eShortwave ngenyanga edluleyo.
Kodwa ngoMvulo, umhleli walumsakazo njalo enguye owawusungulayo ngo2001 uNkosikazi Gerry Jackson wethule umbiko esithi sebevala kokuphela.