Umkhokheli weMDC-T, uMnu. Morgan Tsvangirai uthi wonke amabandla ezombusazwe agoqela eleZanu PF, kumele enze umhlangano labosomabhizimusi kanye labenhlanganiso ezizimeleyo kudingwe amacebo okulungisisa umnotho welizwe.
Ekhuluma lentathelizindaba eHarare ngoLwesine, uTsvangirai uthe ibandla lakhe likubone kufanele ukuthi kube lokukhulumisana kwenkokheli zenhlangothi zonke zempilo kulungisiswe inkinga ilizwe elibhekane lazo.
Wengeze wathi bonke abezombusazwe kumele batshiyane lokuziqhenya baqhobe ingqondo bendawonye.
Usole uMongameli Mugabe esithi seyehlulekile ukubusa kuhle ngezizatho ezehlukeneyo ezigoqela ukungaphili kuhle lokuguga.
Amazwi kaTsvangirai agcizelelwe ngumsekeli wakhe uNkosazana Thokozani Khupe yena othe ngempela sesifikile isikhathi sokuthi uMugabe lebandla lakhe bavume ukuthi sebehlulekile njalo baqalise ukukhulumisana lamanye amabandla.
Uthe kumele kudingwe indlela ezingaphathisa ukuletha inguquko kwezenotho kuthuthukiswe inhlalakahle kazulu.
UTsvangirayi uveze ukuthi ibandla lakhe selilobele abenhlanganiso yeSADC labeAfrican Union libazisa ukuthi kulakho ukuba lokungahlaliseki elizweni izinto zingaqhubeka ngendlela eziyiyo okwamanje.