amalinks wokungena

Breaking News

Tsvangirai: Ukumanyana Kwamabandla Aphikisayo eZimbabwe Kuqakathekile


Umkhokheli weMDC-T umnumzana Morgan Tsvangirai emhlanganweni lentathelizindaba
Umkhokheli weMDC-T umnumzana Morgan Tsvangirai emhlanganweni lentathelizindaba

Umkhokheli webandla le MDC-T uMnu. Morgan Tsvangirai, uthi umanyano wamabandla uqakathekile njalo kuqakathekile ukuthi ususwe umbuso weZanu PF osube khona kusukela eleZimbabwe lathola uzibuse ngomnyaka ka1980.

Umkhokheli weMDC-T umnumzana Morgan Tsvangirai emhlanganweni lentathelizindaba
Umkhokheli weMDC-T umnumzana Morgan Tsvangirai emhlanganweni lentathelizindaba

UTsvangirai utshele umhlangano lentathelizindaba emahofisini akhe awe Harvest House ukuba ukumanyana kwamabandla aphikisayo yiyo kuphela ndlela engaphathisa ukususa umbuso kamongameli Robert Mugabe lebandla lakhe leZanu PF.

Wengeza uTsvangirai ethi kungakho abebandla lakhe behlezi bekhankasela ukusebenzelana kwamabandla angaphansi komanyano we National Electoral Reform Agenda- NERA.

Wathi bazimisele ukusebenzelana lalabo abalombono ofana lowabo, wokukhankasela ukuguqulwa kwendlela ukhetho oluqhutshwa ngayo kanye lokusebenzela uzulu hatshi ukuzicabanga bona.

Ukulwisana Ienzondano phakathi kwamabandla aphikisayo, akumelanga kusiphazamisekulempi lokulwisa yokususa umongameli Mugabe lebandla lakhe le Zanu Pf ebukhosini,kulethe umbuso omutsha. Ndawonye kumele sikhule enqonweni,sehlukane lombono wokuba ngusimayedwa,sidinga ukusebenza ndawonye nxa kuyikuthi sifuna ukuletha umbuso omutsha ngoba isikhathi sesifikile. Kusobala ukuba indlela kuphela esisele,ngesikhathi kulungiselelwa ukhetho oluzayo,kuyikuba abamabandla aphikisayo,asebenze ndawonye ukuvuselela uzinga ebantwini kwezombusazwe.

UTsvangirai uthi inkulumo ezikhomba ukuba yena lebandla lakhe sebekhulumisana lowake waba ngumsekeli kamongameli, unkosikazi Joice Mujuru, lihungahunga nje intathelizindaba eziloba ngalo, lingasi qiniso.

Umanyano waloluhlobo,wenziwa lamabandla aziwayo.Okwamanje kuzintathelizindaba ezikhuluma ngezePeople First,angazi ukuba selabunjwa na lelobandla,kungaba ngumcabango nje okuyikhona uzakafezeki,kodwa ngokwazi kwethu,kalikho lelibandla,okukhulunywa ngalo. Umuntu wenza akubonayo,bayaxoxisana kumabandla abo,kukhangelwa amathuba kodwa iqiniso yikuba kazikho inkulumo zalolohlobo engizaziyo.

Umsekeli kanobhala obona ngezokwethulwa kwemibiko kuhlangothi lwabasakhulayo, kuMDC-T, umnumzana Vusumuzi Moyo ugcizelele ukuba, yinye zwi indlela yokususa ngayo ubukhokheli bebandla elibusayo leZanu PF ebukhosini. Ethi uMoyo bona yibo abalempendulo engaletha inguquko kuzulu weZimbabwe osebhekane lenkinga ezinengi okubalisa ukusilela kokudla ngenxa yokungani kuhle kwezulu, isimo esibi somnotho lokunye okunenginengi.

Kunsukwana ezisanda kwedlula, umkhokheli webandla le People’s Democratic Party - PDP umnumzana Tendayi Biti, laye ugcizelele phezu kokuqakatheka kokusebenzelana kwamabandla, ngombono munye ukuletha inguquko kwezombusazwe lezomnotho.

Unobhala jikelele we PDP, uDr Gorden Moyo uthi uyancomeka lumbono, wona owaqalwa yibo mathupha, abangakufuniyo kuyikuba kube labanye abamabandla aphikisayo azafuna ukuzenza obhudi balomanyano.

Engazinikela amabandla ezombusazwe, uMoyo uthi kungaphathisa kakhulu ekuqedeni indubo ilizwe libhekane lazo.

Kodwa umkhokheli welinye lamabandla aphikisayo leRenewal Democratic of Zimbabwe, umnumzana Elton Mangoma uthi abebandla lakhe abayikuba yingxenye yalomanyano wamabandla lanxa kungumbono omuhle.

Ukukhangela udaba lokhetho lodwa,kusitsho ukuba sekukhulunywa ngezokuthatha intambo zombuso,ukuba lamandla kuphela,hatshi okunye. Kasifuni ukuthi sithi sikhuluma ngodaba lokhetho,asuswe kukaMongameli,sekungeniwe embusweni sithole ukuba esesibangenisile laba kungabantu abenza ububi obedlula obukaMugabe. Sifuna ukwazi ukuba kuyini okumunyethwe yilomanyano,hatshi ukuba siphatheke kokukodwa lokhu. Kungakho thina sisithi sima ngelokuthi kasiyi kuphatheka kunhlelo zabanye abantu,ngoba kungasikho esingakho. Kumele kube yinguquko uqobo,singaze saphinda khona kanye okwenziwa libandla leZanu PF.

Lanxa besehlukana kundlela lumanyano ungaqhutshwa ngayo, abamabandla la bayavumelana ukuba akula ngenye indlela ngaphandle kokumanyana, basebenzelane ndawonye ngenjongo yokususa ubukhokheli beZanu PF.

XS
SM
MD
LG