Umhlangano weKimberly Process, oqale ngoMvulo eWashington DC uqhubekele phambili ngoLwesibili abaphatheka kuwo bekhulumisana ngokutshiyeneyo okuphathelane lokuthengiswa kwamadayimana kanye lokusebenza kwalinhlanganiso.
Abenhlanganiso ezizimeleyo zeZimbabwe batshele lumhlangano ukuthi bafuna uhulumende aveze sobala ukuthi amadayimana atholakala eMarange anganani lokuthi imali etholakalayo ekuthengisweni kwawo isetshenziswa njani.
Umphathintambo wezemigodi uMnu Obert Mpofu ubikwa ethembise ukuthi uhulumende uzakwenza njengokufuna kwabenhlanganiso ezizimeleyo.
Udaba lwamadayimana eMarange luzaqhubeka luphathwa lapha lalaphaya kulumhlangano lanxa nje ungaqondananga leZimbabwe.
Amazwe athi iZimbabwe leGhana abikwa ecele iKimberley Process ukuthi avunyelwe ukuvula amahofisi alinhlanganiso. Akukazakali ukuthi yiliphi elizaphiwa leyo mvumo.
