Ucwaningo olwenziwe yinhlanganiso ye Mass Public Opinion Institute oluveze ukuba inengi le Zimbabwe liyamethemba uMongameli Mugabe seludale inkulumo.
Lolucwaningo luveze njalo ukuba uzulu uyamesaba uMongameli Mugabe lanxa emethemba.
Enye inkokheli elandela uMongameli Mugabe nguMnu. Morgan Tsvangirai owebandla le MDC kuthi uNkosikazi Joice Mujuru ngowesithathu kulandele uMnu. Simba Makoni owe Mavambo Kusile Dawn kuluhlu lwenkokheli ethembakalayo.
Isilinganiso sabantu abangamatshumi phose amahlanu ( 47% ), bathi bazimisele ukuvotela uMongameli Mugabe kukhetho lokudinga umongameli laloba lungenziwa kusasa lokhu.
Inhlanganiso ye MPOI ithi yakhuluma labantu abayinkulungwane lamakhulu amabili, 1 200 ukuze iphume lempumela yalolucwaningo.
Abafana labo Mnu. Welshman Ncube lo Dumiso Dabengwa balandela khatshana. Lolucwaningo selutshiye uzulu elemibuzo eminengi. Ukuhlaziya loludaba sixoxe lengcwethi ecubungula ezombusazwe, uMnu. Dumisani Nkomo othi kunzima ukupha leqiniso ngenxa yomumo welizwe.
"Kuba nzima ukuthi kuphume impumela engasoze isolwe nguzulu ngoba kuba lengxaki ezinengi ezifana lokwesaba ezenza abantu bakhulume okungasiqiniso," kutsho uNkomo.