Abebandla elibusayo ele Zanu PF bayalwisana kuluthuli bebangisana izikhundla, abanye ngabaxotshwayo ebandleni baxotshwe lasezikhundleni zobukhokheli kuhulumende kodwa isimanga yikuba amabandla aphikisayo lawo enza khonokho okwenziwa ngabebandla elibusayo. Amabandla la lokhe edabukene phakathi sokuze kulamaMDC amahlanu awaxexebuka kubandla elikhokhelwa nguMnu. Morgan Tsvangirai kuzoba lamanye lawo amanenginengi.
Abantu makhaza bacina sebezibuza ukuthi manje lezi nkokheli zimele bona kumbe hatshi. Sokulombuzo wokuthi bathembele kuliphi ibandla sibisibili. Ukuhlaziya lolu daba uPraxedes Jeremiah weStudio Seven uxoxe labalwela ilungelo labesifazana uNkosazana Febbie Dube kanye lo uNkosazana Julian Ngwenya onguye osungula lingxoxo.
“Okudanisayo ngeZimbabwe yikuthi abamabandla wonke ezombusazwe kungakhathalekile ukuthi ngaphikisayo kumbe ngelibusayo ele Zanu PF, ikakhulu inkokheli isiqakathekisa ukuzitholela izikhundla kanye lokuzinothisa inganaki abantu makhaza” kutsho uMaNgwenya.
Unkosazana Dube yena uthi “Inengi liyazi ukuthi lithembele ngaphi kwezenkokheli, kodwa udubo nje yikuthi imithetho yelizwe yona lokhe ingakalungisiswa ukuthi ihambelane lesisekelo sombuso, yikhoke lanxa singaze sivote siyakwazi ukuthi labo abafunwa zinhliziyo zethu abasoze bawufinyelele umbuso ngoba lempumela yokhetho ilakho ukuphazanyiswa ukuthi ingavezi iqiniso”.
