amalinks wokungena

Breaking News

UZulu Uthathelwa Inhlanyelo Emgcele weZimbabwe leBotswana


AbeZimbabwe abajwayele ukuthenga inhlanyelo kweleBotswana bakhala ngokuthi izisebenzi zikahulumende emgceleni wePlumtree zibathathela inhlanyelo zisithi ngezinye zemphahla okungamelanga zithengwe ngaphandle kwelizwe. Kodwa bathi akula mbiko eyaneleyo ebazisa lokhu njalo kukhona umhlobo wenhlanyelo osilelayo eZimbabwe.

Umnunzana Ozias Nkomo ohlala ePlumtree uthi yena ujayele ukuthi minyaka yonke ayeqe umngcele azothenga inhlanyelo kweleBotswana elungiselela isikhathi sokulima.

Kodwa uthi umangaliswe ngumthetho wokuthi inhlanyelo kumele ithengwe eZimbabwe kuphela, ngesikhathi eminye imihlobo yenhlanyelo iselela elizweni.

Ngokunjalo umnumzana Thulani Maphosa uthi umthetho omutsha, abangazange baziswe ngawo, awulunganga uma ilizwe likhangelele ukuthuthikisa isivuno ngesikhathi amazwe womhlaba ebhekane lokuguquka komkhathi kanye leyezi elivame ukuletha indlala lengozi zezulu lesisikhukhula ele El Nino.

Osebenza kweleBotswana umnumzana Michael Dube yena ubona kulinyathelo elibuyisela emuva ukuthi inhlanyelo ithengwe kuphela eZimbabwe.

Uthi uhulumende weZimbabwe kumele afake umthetho ofana lalo uma elisiqiniseko sokuthi inhlanyelo yonke ikhona elizweni njalo ilentengo eyeneliswa linengi labalimi emaphandleni.

Inengi labalimi beZimbabwe selitshengise ukudana ngentengo ephezulu ethengiswa ngayo inhlanyelo ikakhulu eyomumbu.

Inhlanyelo ayiso yodwa engaphansi kwemphahla okusavunyelwa ukuyithenga ngaphandle kwelizwe ngesikhathi uhulumende weZimbabwe ezama ukuqinisa imithetho yokuvikela amabhizimusi asekhaya. Kodwa inengi lithi lokhu kumele kwenzakale kuphela uma amabhizimusi la esenelisa ukusuthisa uzulu hatshi uma imphahla isilela kumbe idula.

XS
SM
MD
LG